Xalq deputatlari Chilonzor tumani Kengashining 24-sessiyasida Chilonzor tumanida 2026-yilning 7 oyi davomida yoshlar bilan ishlash tizimida amalga oshirilgan ishlarning natijadorligi to‘g‘risidagi masala muhokama qilindi.
❓ Mazkur masala yuzasidan Kengash deputati Mamatqulov Ilhom Abdurashidovich tomonidan yoshlarni qo‘llab-quvvatlash va jinoyatchilikning oldini olishga qaratilgan muhim taklif bildirildi.
🎙 Taklif:
Jinoyatchilik sodir etgani uchun ozodlikdan mahrum qilish jazosini o‘tab bo‘lgan yoshlarning keyingi hayoti, jamiyatga moslashuvi va bandligini ta’minlash masalasiga alohida e’tibor qaratish zarur.
Jazoni o‘tab chiqqan yoshlarni ish bilan ta’minlash, ularga munosib mehnat sharoitlari yaratish va barqaror daromad manbaiga ega bo‘lishiga ko‘maklashish bo‘yicha aniq chora-tadbirlarni belgilash lozim. Chunki yoshlarning jazoni o‘tab chiqqandan so‘ng ishsiz va daromadsiz qolishi, hayotda o‘z o‘rnini topa olmasligi ularning yana jinoyat sodir etish yo‘liga qaytib qolishiga sabab bo‘lishi mumkin.
Shu bois, bu boradagi ishlarni faqat profilaktika inspektorlari nazorati bilan cheklab qolmasdan, yoshlarning bandligini ta’minlash, kasb-hunarga o‘qitish, zamonaviy kasblarga yo‘naltirish va doimiy daromad manbaiga ega bo‘lishiga amaliy yordam ko‘rsatish muhim.
Shuningdek, jazoni o‘tab chiqqan yoshlarni boshqa yoshlardan ajratib qo‘ymasdan, ularni jamiyatga qayta integratsiya qilish, ijtimoiy hayotga faol jalb etish va qo‘llab-quvvatlash choralarini kuchaytirish zarur.
Yoshlarning qiziqishi va qobiliyatidan kelib chiqib, ularni zamonaviy kasblarga yo‘naltirish, ishga joylashtirish hamda tadbirkorlik bilan shug‘ullanishi uchun imkoniyatlar yaratish orqali ularning kelajagiga mustahkam poydevor yaratish mumkin.
📌 Deputat tomonidan tumanda jazoni o‘tab chiqqan yoshlar bilan ishlashda ularning bandligini ta’minlashga qaratilgan aniq mexanizmlarni ishlab chiqish va bu yo‘nalishda mas’ul tashkilotlarning hamkorligini kuchaytirish taklif etildi.