ҲАР БИР ХОНАДОН — ЭЪТИБОРДА, ҲАР БИР ОИЛА — ҚЎЛЛАБ-ҚУВВАТЛОВДА
Президентимиз томонидан белгилаб берилган вазифалар ижросини таъминлаш, аҳоли бандлигини ошириш, камбағалликни қисқартириш ҳамда хонадонлар даромадини кўпайтириш мақсадида Янгиқўрғон туманида хонадонбай ишлаш тизими асосидаги ўрганишлар изчил давом этмоқда.
Хусусан, «Янгибоғистон» маҳалласида аҳоли бандлигини таъминлаш, камбағал оилаларни қўллаб-қувватлаш, фуқароларни тадбиркорликка кенг жалб этиш ва хонадонлардаги мавжуд имкониятлардан самарали фойдаланишга қаратилган манзилли ишлар амалга оширилмоқда.
Бугун туман ҳокими, Халқ депутатлари Янгиқўрғон тумани Кенгаши депутати А.Нажмиддинов бошчилигидаги ишчи гуруҳ томонидан маҳалла «еттилиги» билан учрашув ўтказилди. Унда ҳудуддаги камбағал ҳамда ижтимоий реестрга киритилган оилалар билан ишлаш самарадорлигини ошириш масалалари муҳокама қилинди.
Учрашув давомида ҳар бир оиланинг ижтимоий ҳолати, меҳнат салоҳияти ва мавжуд имкониятларидан келиб чиқиб, уларни иш билан таъминлаш, касб-ҳунарга ўргатиш, тадбиркорлик фаолиятига жалб этиш ҳамда доимий даромад манбасини шакллантириш бўйича аниқ вазифалар белгилаб олинди.
Шундан сўнг ишчи гуруҳ аъзолари хонадонма-хонадон юриб, камбағал ва ижтимоий реестрдаги оилаларнинг муаммо ҳамда эҳтиёжларини ўргандилар. Ҳар бир хонадондаги имкониятлар таҳлил қилиниб, оилалар даромадини оширишга қаратилган амалий таклифлар ишлаб чиқилди
Зеро, камбағалликни қисқартириш рақамлар ортидан қувиш эмас, аввало, ҳар бир оила ва ҳар бир хонадон ҳаётига кириб бориш, муаммоларни аниқлаш ҳамда уларнинг ечими учун аниқ имкониятлар яратишдан бошланади.