YO‘L HARAKATI XAVFSIZLIGI BO‘YICHA DEPUTATLIK SO‘ROVI YUBORILDI

Xalq deputatlari Qo‘shko‘pir tumani Kengashi deputati Azizbek Erkinov Ilg‘aldi mahallasining markaziy ko‘chalaridan biri hisoblangan Tadbirkorlar ko‘chasida joylashgan eski madaniyat uyi oldidagi tartibga solinmagan T-chorrahadagi mavjud holatni o‘rgandi.

O‘rganish davomida mazkur chorrahada yo‘l harakati xavfsizligini ta’minlovchi yo‘l belgilari o‘rnatilmagani, shuningdek, ushbu hudud orqali ikki mahalla aholisi transport vositalarining faol harakatlanishi inobatga olinib, chorrahani tartibga keltirish zarurligi qayd etildi.

Shuningdek, Ilg‘aldi mahallasida joylashgan 31-sonli umumiy o‘rta ta’lim maktabi oldidagi o‘quvchilar tomonidan faol foydalaniladigan yo‘l kesishmasida piyodalar xavfsizligini ta’minlash maqsadida tegishli «Bolalar» yo‘l belgisini o‘rnatish hamda piyodalar o‘tish joyini belgilovchi «zebra» chizig‘ini tushirish masalasi ko‘tarildi.

Mazkur masalalarni amaliy jihatdan hal etish, yo‘l harakati xavfsizligini ta’minlash va fuqarolar, ayniqsa, maktab o‘quvchilarining xavfsiz harakatlanishi uchun zarur shart-sharoitlarni yaratish maqsadida Qo‘shko‘pir tumani yo‘llardan foydalanish korxonasi davlat muassasasi rahbari D. R. Sapayev nomiga deputatlik so‘rovi yuborildi.

Deputatlik so‘rovida aniqlangan muammolarni belgilangan tartibda ko‘rib chiqish hamda ularni bartaraf etish yuzasidan amaliy choralar ko‘rish so‘raldi.