Termiz shahrida mahallalar infratuzilmasini yaxshilash, hududlarda keng ko‘lamli obodonlashtirish va ko‘kalamzorlashtirish ishlarini tizimli tashkil etish hamda jamoatchilik nazoratini kuchaytirish borasidagi hamkorlik aloqalari izchil davom ettirilmoqda.

O‘zbekiston Respublikasi Oliy Majlisi Senati a’zosi, viloyat Kengashi deputati D.Suvonova, Termiz shahar Kengashi kotibiyati mudiri, deputat A.Ashurov hamda kotibiyat mutaxassislari shahardagi “Alpomish” mahallasida bo‘lishdi.

Mas’ullar tashrif davomida hududda amalga oshirilayotgan obodonlashtirish va sanitariya-tozalik ishlarining bugungi holati yuzasidan mahalla faollari hamda oqsoqollar bilan atroflicha suhbat muloqot o‘tkazdilar.

Mazkur nazorat-tahlil jarayoni Oliy Majlis Senati tomonidan mahalliy Kengash deputatlari faoliyati uchun belgilangan “Mahalliy Kengash deputati faoliyatining eng muhim 24 ta yo‘nalishi” mezonlari doirasida olib borildi.

Suhbat davomida mahalla faollari bilan quyidagi muhim masalalar muhokama qilindi:

Ko‘chalar obodligi va jamoatchilik ishtiroki: Mahallada olib borilayotgan tozalik va obodonchilik ishlarida aholi va yoshlarning faolligini oshirish, ekologik madaniyatni yuksaltirish;

"Yashil makon" loyihasi: Mahalladagi yashil hududlar, daraxtlar va gulzorlarni parvarish qilish tizimini samarali yo‘lga qo‘yish;

"Mahalla yettiligi" va faollar hamkorligi: Obodonlashtirish borasida aniqlangan muammolarni (chiqindi yig'ish, yo'laklarni ta'mirlash) mahalla mas’ullari hamkorligida tezkor hal etish mexanizmlari.

D.Suvonova: "Mahalla obodligi — uning ahilligi va faollarining fidoyiligidan boshlanadi!"

"Mahallalarni obod qilish va ozoda saqlash faqatgina davlat idoralarining emas, balki shu hududda yashayotgan har bir fuqaroning, ayniqsa, mahalla faollarining kunlik daxldorlik hissiga bog'liq. 'Alpomish' mahallasida amalga oshirilayotgan ishlar, yo'llarni ta'mirlash jarayonlari tahsinga loyiq. Biz deputatlik va senatorlik nazoratimiz doirasida faollarimiz tashabbuslarini doimiy qo‘llab-quvvatlaymiz," — deya ta'kidladi Senator.

📈 Muloqot yakunida mahalla faollari tomonidan o‘rtaga tashlangan takliflar inobatga olinib, hududni yanada ko‘rkam maskanga aylantirish bo‘yicha qo‘shma chora-tadbirlar belgilab olindi.