Xalq deputatlari Parkent tuman Kengashining 19-“Chashma” saylov okrugidan saylangan deputati Xojiboyev Jalol Xotamboyevich tomonidan o‘zi saylangan hududdagi “Xurriyat” mahalla fuqarolar yig‘inida joylashgan 46-sonli oilaviy shifokorlik punktida o‘rganish ishlari olib borildi.Mazkur o‘rganishdan ko‘zlangan asosiy maqsad navbatdagi sessiya kun tartibiga kiritilgan Parkent tuman tibbiyot birlashmasi rahbarining hisoboti yuzasidan joylarda nazorat-tahlil tadbirlarini o‘tkazish hamda aholiga ko‘rsatilayotgan tibbiy xizmatlar sifatini o‘rganishdan iborat bo‘ldi. O‘rganishda tuman Kengashi kotibiyati bosh mutaxassisi Mirzayev Dilshod Ruxutdin o‘g‘li ham ishtirok etdi.O‘rganish davomida deputat oilaviy shifokorlik punkti rahbari bilan uchrashib, aholiga o‘z vaqtida va sifatli tibbiy yordam ko‘rsatilishi, bepul beriladigan dori vositalari bilan ta’minlash holati hamda mavjud sharoitlar yuzasidan suhbatlashdi.Jarayonda muassasa mudiri tomonidan aholiga bepul yetkazib beriladigan 120 turdagi dori vositalarini qabul qilish, saqlash va tarqatish tartibi haqida batafsil ma’lumot berildi. Shuningdek, dorilar va tibbiy buyumlarga bo‘lgan ehtiyojni aniqlash hamda ularni taqsimlash jarayonlari yuzasidan tushuntirishlar berildi.Ma’lum qilinishicha, mazkur oilaviy shifokorlik punktida 6 nafar shifokor va 40 nafar hamshira tomonidan hudud aholisiga birlamchi tibbiy xizmatlar ko‘rsatib kelinmoqda.O‘rganish yakunida deputat muassasaga kelgan fuqarolar bilan muloqot o‘tkazib, navbatdagi sessiyada ko‘rib chiqiladigan Parkent tuman tibbiyot birlashmasi rahbarining hisoboti yuzasidan aholini qiynayotgan mavjud muammo va takliflarni o‘rgandi. Bildirilgan murojaatlar yuzasidan navbatdagi doimiy komissiya yig‘ilishida mas’ul tashkilot va muassasa rahbarlariga deputatlik nazorati tartibida tegishli savollar kiritilishi belgilandi.