Мa’lum boʻlishicha, Oltinsoy tumani “Olmazor” mahallasida istiqomat qiluvchi fuqarolar tomonidan elektr ta’minoti sifatini yaxshilash maqsadida homiylar koʻmagida 11 dona beton elektr uzatish ustunlari (asbob-uskunalari) olib kelingan edi.

Biroq ushbu ustunlarni oʻrnatish boʻyicha aholi tomonidan tuman elektr ta’minoti korxonasiga bir necha marotaba ogʻzaki murojaat qilingan boʻlsa-da, masʼul tashkilotlar tomonidan amaliy chora koʻrilmagan.

Ustunlarning uzoq muddat davomida oʻrnatilmay qolayotgani aholi oʻrtasida haqli eʼtirozlarga sabab boʻlayotgan edi. 

Mazkur muammoni joyida oʻrgangan deputat X.Ziyatovich 2026-yil 10-iyun kuni Oltinsoy tuman Elektr ta’minoti boshligʻi Y.Jumaqulovga 125-ds-402-26-sonli rasmiy deputatlik soʻrovini yubordi. Deputat oʻz soʻrovida Ma’muriy javobgarlik toʻgʻrisidagi kodeksning 193-moddasiga asosan deputatlik soʻrovini mensimaslik yoki javobsiz qoldirish qonuniy javobgarlikka sabab boʻlishini ham eslatib oʻtgan. 

Ushbu qat’iy soʻrovdan soʻng masalaga tuman elektr ta’minoti korxonasi mas’ullari jiddiy yondashishga majbur
boʻldi. “Hududiy elektr tarmoqlari” AJ Surxondaryo hududiy filiali Oltinsoy tuman elektr ta’minoti korxonasi tomonidan 2026-yil 16-iyundagi 01-01/318-sonli javob xati bilan ushbu ustunlarni oʻrnatish va montaj ishlari Oltinsoy TET korxonasi tomonidan toʻliq bajarilishi maʼlum qilindi. 

Ayni paytda oʻrnatilgan yangi beton ustunlar va amalga oshirilgan ishlar sifati deputat X.Ziyatovich tomonidan joyiga chiqqan holda, mahalla faollari ishtirokida bevosita koʻzdan kechirildi va nazoratga olindi. 

Bu kabi holatlar xalq saylagan vakillarning oʻz vazifasiga mas’uliyat bilan yondashishi va ijro hokimiyati organlari bilan tizimli hamkorligi aholini qiynayotgan ijtimoiy-iqtisodiy muammolarni tez va samarali hal etishga xizmat qilishini yana bir bor isbotlamoqda.

✍️Oltinsoy tumani Kengash Kotibiyati Axborot xizmati

🕊Telegram💬Facebook 🌐E-kengash 📸Instagram ▶️YouTube🌐oltinsoy.uz