Xalq deputatlari Karmana tumani Kengashining 24-Malik saylov okrugidan saylangan deputat Bopilov Mahmud Toshtemirovich aholi farovonligini oshirish va davlat tomonidan berilayotgan ijtimoiy imtiyozlarning joylardagi ijrosini ta'minlash maqsadida "Xazora" mahalla fuqarolar yig‘inida o‘rganish ishlarini olib bordi. Deputat dastlab mahallada kambag‘allikni qisqartirish va bandlikni ta'minlash borasida eng muhim bo‘g‘in hisoblangan hokim yordamchisining faoliyati, hududning "o‘sish nuqtalari" hamda ehtiyojmand oilalarga ko‘rsatilayotgan ko‘maklar samaradorligi bilan yaqindan tanishdi. O‘rganishlar davomida davlatimiz tomonidan nogironligi bo‘lgan shaxslarni ijtimoiy qo‘llab-quvvatlash tizimi doirasida yaratilgan imtiyozlarni bevosita har bir xonadonga yetkazishga alohida e'tibor qaratildi.
Xususan, xalq vakili M. Bopilov hududdagi o‘rganishlari davomida "Xazora" mahallasida istiqomat qiluvchi, alohida e'tibor va ijtimoiy himoyaga muhtoj bo‘lgan 1-guruh nogironi A. Davlatov xonadoniga tashrif buyurdi. Oilaning yashash sharoiti va moddiy ahvoli atroflicha ko‘zdan kechirilgach, nogironligi bo‘lgan fuqarolarni qo‘llab-quvvatlashga doir qonunchilikda belgilangan imtiyozlardan foydalangan holda ushbu xonadonda barqaror daromad manbaini yaratish choralari ko‘rildi. Hokim yordamchisining amaliy sa'y-harakatlari natijasida, qisqa muddat ichida fuqaro A. Davlatov oilasiga davlat tomonidan ajratiladigan imtiyozli ssuda (moliyaviy ko‘mak) mablag‘lari rasmiylashtirib berildi.
Ajratilgan ushbu maqsadli mablag‘lar evaziga xonadonga qo‘shimcha barqaror daromad kirishi uchun mustahkam zamin bo‘ladi. Deputat Mahmud Bopilov ta'kidlaganidek, nogironligi bo‘lgan shaxslarga berilayotgan bunday imtiyoz va e'tibor har bir muhtoj fuqaro hayotida o‘z aksini topishi shart va ushbu yo‘nalishdagi manzilli tadbirlar saylov okrugi hududida qat'iy nazorat ostida izchil davom ettiriladi.