Xalq deputatlari Qo‘ng‘irot tumani Kengashi deputati
Otelbaev Baxtiyar Aybekovichning munosabati:  

“Mazkur yig‘ilishda belgilangan vazifalar bilan
tanishar ekanman, eng avvalo, Qoraqalpog‘istonning, xususan, Qo‘ng‘irot
tumanining kelgusi rivoji uchun yaratilayotgan keng imkoniyatlar e’tiborimni
tortdi. 

Bugun Qo‘ng‘irot nafaqat Qoraqalpog‘iston, balki
mamlakatimizning energetika va investitsiya salohiyati yuqori hududlaridan
biriga aylanib bormoqda. Yig‘ilishda tumanda qiymati 2,6 milliard dollar,
quvvati 1,5 ming megavatt bo‘lgan yirik shamol elektr stansiyasi qurilishi
boshlanganligi qayd etildi. Loyiha doirasida yuqori kuchlanishli elektr
tarmoqlari va podstansiyalar barpo etilishi tumanning energetika salohiyatini
yanada mustahkamlashga xizmat qiladi. 

Men deputat sifatida ushbu loyihalarni faqat yirik
raqamlar bilan emas, avvalo, odamlar hayotidagi amaliy natijalar bilan baholash
muhim, deb hisoblayman. Yangi investitsiyalar — bu yangi ishlab chiqarish,
yangi kasb va mutaxassisliklar, yangi ish o‘rinlari hamda mahallalar rivoji
uchun qo‘shimcha imkoniyatlar demakdir. 

Yig‘ilishda Qo‘ng‘irot bilan bog‘liq yana bir muhim
masala — transport va infratuzilmani rivojlantirishga katta e’tibor qaratilgani
ham alohida ahamiyatga ega. A-380 magistral yo‘lining Qo‘ng‘irot hududidan
o‘tuvchi qismi modernizatsiya qilinishi, ichimlik suvi tarmoqlarining
kengaytirilishi, ijtimoiy soha obyektlarining rivojlantirilishi tumandagi aholi
uchun qulay sharoitlarni yanada yaxshilashga xizmat qiladi. 

Bundan tashqari, “Qo‘ng‘irot – Qorao‘zak – Taxiatosh”
yo‘nalishining “yashil sanoat yo‘lagi” sifatida rivojlantirilishi hududimizni
zamonaviy sanoat, energetika va texnologiyalar markazlaridan biriga aylantirish
uchun yangi istiqbollarni ochmoqda. 

Bugungi vazifa — mavjud imkoniyatlardan samarali
foydalanish, yirik loyihalarning joylarda o‘z vaqtida va sifatli amalga
oshirilishini ta’minlash, eng muhimi, ularning natijasini aholi farovonligida
namoyon etishdir. 

Deputat sifatida men saylovchilar manfaatlarini
ifodalash, hududdagi muammolarni o‘rganish va belgilangan vazifalarning amaliy
ijrosi ustidan deputatlik nazoratini olib borishni o‘z faoliyatimning muhim
yo‘nalishlaridan biri deb bilaman. 

Qoraqalpog‘iston uchun belgilangan ulkan maqsadlar
Qo‘ng‘irot uchun ham yangi imkoniyatlar eshigini ochmoqda. Bu imkoniyatlardan
oqilona foydalanish, investitsiyalarni samarali loyihalarga yo‘naltirish va
yaratilayotgan sharoitlarni xalqimiz manfaatiga xizmat qildirish —
barchamizning mas’uliyatli vazifamizdir.”