Xalq deputatlari Qo‘qon shahar Kengashi raisi A.Nosirov hamda shahar hokimining maslahatchisi D.Alimova bilan hamkorlikda “Mustaqillik” mahallasida Oʻzbekiston Respublikasining 1995-yil 21-dekabrdagi 167-I-son “Oʻzbekiston Respublikasining davlat tili haqida”gi Qonuni talablariga rioya etilishi yuzasidan o‘rganish ishlari olib borildi.

O‘rganish jarayonida mahallada ish yuritish va hujjatlarni rasmiylashtirishning davlat tili talablariga muvofiqligi, xususan, hokim yordamchisi hamda yoshlar yetakchisi tomonidan yuritilayotgan hujjatlarning davlat tilida rasmiylashtirilishi holati ko‘rib chiqildi.

Shuningdek, hujjatlarning lotin yozuviga asoslangan o‘zbek alifbosida yuritilishi, matnlarda davlat tili me’yorlariga rioya qilinishi hamda ish yuritishda o‘zbek tilidan to‘g‘ri foydalanish masalalariga e’tibor qaratildi.

Bundan tashqari, mahalla hududidagi peshlavhalar ham o‘rganilib, ularning lotin yozuviga asoslangan o‘zbek alifbosida yozilgani, mazmunan to‘g‘ri rasmiylashtirilgani va ularda o‘zbek tiliga ustuvorlik berilgani holati ko‘rib chiqildi.

O‘rganish yakunida davlat tili talablariga qat’iy rioya etish, ish yuritish hujjatlarini belgilangan me’yorlar asosida yuritish hamda mahalla hududidagi tashqi yozuv va peshlavhalarda o‘zbek tilining nufuzi va mavqeini ta’minlash yuzasidan tegishli tavsiya va tushuntirishlar berildi.

Xalq deputatlari Qo‘qon shahar Kengashi