NAVBATDAGI SESSIYA MASALASI O‘RGANILDI.

Xalq deputatlari Angor tumani Kengashi 3-Gilambob saylov okrugi deputati Mavlonova Ra’no tomonidan navbatdagi sessiya kun tartibiga kiritilgan “Tuman tibbiyot birlashmasida dori-darmon xaridlari, tibbiy asbob-uskunalar yetkazib berish shartnomalari hamda bo‘sh ish o‘rinlarini taqsimlash holati” yuzasidan o‘rganish olib borildi.O‘rganish jarayoni 4-son oilaviy poliklinikada tashkil etilib, tibbiyot muassasasidagi dori-darmon ta’minoti, ularning mavjudligi hamda fuqarolarga yetkazib berilishi holati ko‘zdan kechirildi.

Mas’ullar tomonidan poliklinikaga yetkazib berilishi lozim bo‘lgan 120 turdagi dori-darmonning 90 turi mavjudligi haqida deputatga ma’lumot berildi. Shuningdek, mavjud dori vositalari fuqarolarga, jumladan, restrga kiritilgan xotin-qizlarga belgilangan tartibda tarqatilayotgani ta’kidlandi.

O‘rganish davomida dori-darmonlarning mavjudligi, saqlanishi va aholiga yetkazib berilishi bilan bog‘liq masalalarga alohida e’tibor qaratilib, aniqlangan holatlar yuzasidan mas’ullarga tegishli deputatlik soʻrovi yuborilishi belgilandi.

Mazkur o‘rganishdan ko‘zlangan asosiy maqsad — aholiga sifatli tibbiy xizmat ko‘rsatish, dori-darmon ta’minotini yaxshilash hamda fuqarolar murojaatlarida ko‘tarilayotgan masalalarning amaliy yechimini ta’minlashdan iborat.