Bugun Taxiatosh tumanidagi Maktabgacha va maktab ta’limi bo‘limi tasarrufidagi barcha umumiy o‘rta ta’lim maktablarida “Bilimlar kuni” keng nishonlanib, yangi o‘quv yilining ilk qo‘ng‘iroqlari chalindi.

Xususan, tumandagi 6-sonli umumiy o‘rta ta’lim maktabida bu yilgi tadbirlar qo‘shaloq bayramga aylanib ketdi. Tadbir doirasida O‘zbekiston Respublikasi Prezidentining PQ-454-sonli qaroriga asosan, Investitsiya dasturi doirasida to‘liq rekonstruksiya qilingan va foydalanishga topshirilgan 420 o‘rinli zamonaviy qo‘shimcha o‘quv binosining tantanali ochilish marosimi o‘tkazildi.

Marosimda tuman hokimi, Xalq deputatlari Taxiatosh tumani Kengashiga Oʻzbekiston Liberal-demokratik partiyasidan saylangan deputat Sdikov Islambek Muratbayevich ishtirok etib, yig‘ilganlarni eng ulug‘ va eng aziz bayram — Vatanimiz mustaqilligining 35 yilligi, yangi o‘quv yilining boshlanishi hamda barcha qulayliklarga ega yangi inshootning ochilishi bilan samimiy muborakbod etdi.

Tadbir davomida maktab ostonasiga ilk qadam qo‘yayotgan 1-sinf o‘quvchilariga “Prezident sovg‘alari” tantanali ravishda topshirildi. Ushbu zamonaviy ta’lim maskani tuman yoshlarining sifatli bilim olishlari va kelajakda yurt taraqqiyotiga hissa qo‘shadigan mutaxassislar bo‘lib yetishishlarida muhim poydevor bo‘lib xizmat qilishi alohida ta'kidlandi.