2-sentyabr kuni Muzrabot tumanidagi umumiy o‘rta ta’lim maktablarida 2026–2027-o‘quv yilining boshlanishiga bag‘ishlangan “Birinchi qo‘ng‘iroq” va “Bilimlar kuni” tadbirlari ko‘tarinki ruhda o‘tkazildi.

Yangi o‘quv yilining boshlanishi munosabati bilan Xalq deputatlari Muzrabot tumani Kengashiga 10-“Yangiyer” saylov okrugidan saylangan deputat Tangirov Tursunqul tuman Kengashi kotibiyati bosh mutaxassisi B. Xoliqov bilan birgalikda “Yangiyer” mahallasidagi 47-sonli umumiy o‘rta ta’lim maktabida bo‘lib, ta’lim muassasasining yangi o‘quv yiliga tayyorgarlik holati bilan yaqindan tanishdi.

O‘rganish jarayonida maktabda o‘quvchilar uchun yaratilgan shart-sharoitlar, ta’lim-tarbiya jarayonining tashkil etilishi, sinfxonalarning tayyorgarligi hamda o‘quvchilarning sifatli ta’lim olishi uchun mavjud imkoniyatlarga e’tibor qaratildi.

Deputat tomonidan ta’lim tizimida amalga oshirilayotgan islohotlarning joylardagi ijrosi, maktab jamoasi oldida turgan vazifalar va o‘quvchilarga munosib ta’lim-tarbiya berish masalalari yuzasidan fikr almashildi. Ayniqsa, yosh avlodning bilim olishi, bo‘sh vaqtini mazmunli tashkil etishi hamda zamonaviy bilim va ko‘nikmalarni egallashi uchun mavjud imkoniyatlardan samarali foydalanish muhimligi ta’kidlandi.

“Bilimlar kuni” tadbiri yakunida maktabning 1-sinfga qadam qo‘ygan o‘quvchilariga Prezident sovg‘alari tantanali ravishda topshirildi. Yangi o‘quv yili barcha o‘qituvchi va o‘quvchilar uchun yangi bilimlar, yutuqlar va ezgu maqsadlar sari dadil qadamlar yili bo‘lishi tilandi.