Xalq deputatlari Andijon viloyati Kengashi kotibiyati mudiri N.Toychieva Ulug‘nor tumani Mingchinor mahallasi hududida barpo etilayotgan angar uslubidagi tikuvchilik korxonasi qurilish ishlari ko‘zdan kechirdi. Mazkur loyiha mahallada sanoat infratuzilmasini rivojlantirish, aholi, ayniqsa xotin-qizlar va yoshlar uchun yangi ish o‘rinlari yaratish, shuningdek, mahalliy ishlab chiqarish hajmini oshirishga xizmat qilishi bilan ahamiyatlidir. Tashrif davomida qurilish ishlarining bugungi holati, belgilangan reja-jadval asosida olib borilayotgan ishlar, muhandislik-kommunikatsiya tarmoqlari bilan ta’minlanganlik hamda loyihani o‘z vaqtida foydalanishga topshirish yuzasidan amalga oshirilayotgan chora-tadbirlar muhokama qilindi. N.Toychieva mas’ullar bilan suhbat davomida qurilish ishlarining sifati va muddatlariga alohida e’tibor qaratish, loyihani belgilangan muddatlarda to‘liq yakunlash hamda korxonani tez fursatda ishga tushirish orqali yangi ish o‘rinlarini yaratish muhim vazifa ekanligini ta’kidladi. Shuningdek, qurilish jarayonida yuzaga kelishi mumkin bo‘lgan muammolarni tezkor bartaraf etish, davlat dasturlari doirasida belgilangan vazifalarning to‘liq va samarali ijrosini ta’minlash bo‘yicha tegishli mas’ullarga zarur tavsiya va ko‘rsatmalar berildi. Mazkur loyihaning amalga oshirilishi mahallaning iqtisodiy salohiyatini yuksaltirish, aholi bandligini ta’minlash va hududda tadbirkorlik muhitini yanada rivojlantirishga munosib hissa qo‘shishi kutilmoqda.