Hisobotda ta’kidlanganidek, tuman hududida xotin-qizlarning bandligini ta’minlash, ularni kasb-hunarga o‘qitish, tadbirkorlik faoliyatiga keng jalb etish, oilalarni mustahkamlash, huquqbuzarlik va jinoyatchilikning oldini olish hamda ijtimoiy himoyaga muhtoj xotin-qizlarni qo‘llab-quvvatlash borasida tizimli ishlar amalga oshirilmoqda.

Xususan, 348 nafar xotin-qiz kasb-hunar va tadbirkorlik ko‘nikmalariga o‘qitilgan, 911 nafar xotin-qizning iqtisodiy imkoniyatlarini kengaytirish bo‘yicha amaliy yordam ko‘rsatilgan. Shuningdek, 365 nafar tajribali tadbirkor ayolga xotin-qizlar biriktirilib, “ustoz-shogird” tamoyili asosida manzilli ishlar tashkil etilgan.

Bundan tashqari, xotin-qizlar o‘rtasida huquqbuzarlik va jinoyatchilikning oldini olish, oilaviy nizolarni bartaraf etish hamda ijtimoiy himoyaga muhtoj fuqarolarni qo‘llab-quvvatlash maqsadida 104 ta sayyor qabul va 362 ta targ‘ibot tadbiri o‘tkazilgan. Natijada 130 ta oilani yarashtirishga erishilgan hamda fuqarolarning ko‘plab murojaatlari ijobiy hal etilgan.

Hisobot yuzasidan deputatlar tomonidan oilaviy ajrimlarning oldini olish borasida amalga oshirilayotgan ishlar, yarashtirish komissiyalari faoliyati samaradorligi hamda yarashtirish jarayonlarida erkaklar bilan ham alohida tushuntirish va profilaktik ishlar olib borilishi yuzasidan savollar o‘rtaga tashlandi.

Sessiyada erkaklar bilan alohida profilaktik suhbatlar va treninglar tashkil etish masalasiga ham alohida e’tibor qaratildi. Bu borada ichki ishlar organlari tomonidan maxsus dasturlar asosida tizimli ishlar olib borilayotgani qayd etildi.

Muhokamalar yakunida deputatlar tomonidan bildirilgan taklif va tavsiyalar inobatga olinib, mazkur masala yuzasidan tegishli qaror qabul qilindi.