Xalq deputatlari Nurobod tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi raisi X.Xazratova, doimiy komissiyaga biriktirilgan Xalq deputatlari Nurobod tumani Kengashi huzuridagi ekspert guruhi a'zosi G.Mirzayeva hamda Xalq deputatlari Nurobod tumani Kengashi kotibiyatining bosh mutaxassisi G.Mahammadieva ishtirokida tumandagi 1-Nurobod saylov okrugiga qarashli Navro‘z mahallasi profilaktika inspektori bilan uchrashuv o‘tkazildi.

⚡️ Mazkur o‘rganish davomida O‘zbekiston Respublikasining 2022-yil 15-apreldagi “Kiberxavfsizlik to‘g‘risida”gi O‘RQ–764-son Qonuni ijrosi yuzasidan mahallada amalga oshirilayotgan ishlar atroflicha o‘rganildi.

⌛Xususan, aholi, ayniqsa yoshlar va nuroniylar o‘rtasida kiberjinoyatlar, internet firibgarligi, noqonuniy havolalar, shaxsiy ma'lumotlarni himoya qilish, bank plastik kartalari va elektron to‘lov tizimlaridan xavfsiz foydalanish bo‘yicha olib borilayotgan profilaktik targ‘ibot-tashviqot ishlari, fuqarolarning kiberxavfsizlik madaniyatini oshirishga qaratilgan tadbirlar hamda bu borada huquqni muhofaza qiluvchi organlar bilan hamkorlik holati tahlil qilindi.

⚡️Shuningdek, profilaktika inspektori tomonidan fuqarolarni telefon va internet orqali sodir etilayotgan firibgarlik holatlaridan ogoh etish, kiberxavfsizlik sohasidagi qonunchilik mazmun-mohiyatini aholiga yetkazish hamda jinoyatlarning oldini olish maqsadida amalga oshirilayotgan chora-tadbirlar yuzasidan axborot berildi.

🔘O‘rganish yakunida “Kiberxavfsizlik to‘g‘risida”gi Qonun talablarining ijrosini yanada kuchaytirish, aholi o‘rtasida huquqiy targ‘ibot ishlarini kengaytirish, fuqarolarning raqamli xavfsizlik bo‘yicha bilim va ko‘nikmalarini oshirish hamda mutasaddi tashkilotlar hamkorligini mustahkamlash yuzasidan tegishli tavsiya va takliflar bildirildi.

⚡️Mazkur o‘rganish natijalari Xalq deputatlari Nurobod tumani Kengashining doimiy komissiyasi tomonidan umumlashtirilib, qonun ijrosi ustidan deputatlik nazoratini samarali tashkil etish yuzasidan tegishli choralar ko‘riladi.