Xalq deputatlari Marg‘ilon shahar Kengashi deputatlari tomonidan O‘zbekiston Respublikasining 2002-yil 5-apreldagi №362-II sonli“Chiqindilar to‘g‘risida”gi Qonuni ijrosi yuzasidan deputatlik nazorati davom ettirilmoqda.

Navbatdagi o‘rganishlar doirasida Xalq deputatlari Marg‘ilon shahar Kengashi kotibiyati mudiri A.Ermatov hamda Agrar, suv xo‘jaligi va ekologiya masalalari bo‘yicha doimiy komissiya raisi Z.Domilayev tomonidan Zuhro mahallasi hududidagi ko‘p qavatli uy-joylarda chiqindilarni boshqarish tizimining amaldagi holati o‘rganildi.

O‘rganish jarayonida maishiy chiqindilarni yig‘ish va olib chiqish xizmatlarining tashkil etilishi, chiqindi konteynerlarining mavjudligi va sanitariya holati, chiqindilarni o‘z vaqtida olib chiqish ishlari hamda aholiga ko‘rsatilayotgan kommunal xizmatlar sifati tahlil qilindi.

Shuningdek, ekologik xavfsizlikni ta’minlash, hududlarning sanitariya-tozaligini saqlash va chiqindilarni boshqarish tizimi samaradorligini yanada oshirish masalalariga alohida e’tibor qaratildi.

O‘rganish davomida aniqlangan kamchiliklar yuzasidan mas’ul tashkilotlar vakillari bilan fikr almashilib, mavjud muammolarni bartaraf etish, xizmatlar sifatini yaxshilash hamda aholiga qulay va uzluksiz xizmat ko‘rsatishni ta’minlash bo‘yicha tegishli tavsiya va takliflar bildirildi.

Deputatlik nazorati doirasidagi bunday o‘rganishlar hududlarda ekologik barqarorlikni ta’minlash, sanitariya holatini yaxshilash hamda fuqarolarga ko‘rsatilayotgan kommunal xizmatlar sifatini oshirishga xizmat qilmoqda. Xalq deputatlari Marg‘ilon shahar Kengashi tomonidan mazkur yo‘nalishdagi nazorat tadbirlari davom ettiriladi.