Deputat aralashuvi bilan fuqarolar uchun qulay va xavfsiz harakatlanish yo‘li yaratildi

🇺🇿 Xalq deputatlari Uchtepa tumani Kengashiga Xalq demokratik partiyasidan saylangan "25-Qo‘rg‘on" saylov okrugi deputati Xamitova Galina Gennadyevna Qo‘rg‘ontepa MFY raisi Mahkamov Bahromjon Mahmudjanovich tomonidan bildirilgan murojaat yuzasidan amalga oshirilgan ishlar natijasini joyiga chiqib o‘rgandi. O'rganishda xalq deputatlari Uchtepa tumani Kengashi kotibiyati bosh mutaxassisi Zarnigor Kuziyeva ham qatnashdi.

📝 Murojaatda Qo‘rg‘ontepa mahallasidagi ko‘p qavatli uylar hududidan Zargarlik ko‘chasiga chiqish qismida g‘ishtdan qurilgan devor piyodalar hamda transport vositalarining erkin harakatlanishiga noqulaylik tug‘dirayotgani, ayrim holatlarda esa yo‘l harakati xavfsizligiga salbiy ta’sir ko‘rsatayotgani qayd etilgan.

📂 Mazkur masala xalq deputatlari Uchtepa tumani Kengashi deputatlarining tavsiyaviy xususiyatga ega 24 talik tavsiyalari doirasida, xususan mahalla ichki ko‘cha yo‘llari holati, ko‘chalarni tungi yoritilishi, avtomobil yo‘llaridagi tirbandliklarni kamaytirish hamda yo‘l-transport hodisalari ko‘p sodir bo‘layotgan hududlarda YTHlarning oldini olishga qaratilgan chora-tadbirlar yuzasidan deputatlik nazorati asosida ko‘rib chiqildi.

🔗 Deputatning tashabbusi va mutasaddi tashkilotlar bilan olib borilgan hamkorlik natijasida ko‘p qavatli uylar hududidan Zargarlik ko‘chasiga chiqish qismidagi harakatga to‘sqinlik qilayotgan g‘isht devor olib tashlandi. Uning o‘rniga hududni tartibli saqlash va piyodalar hamda transport vositalarining xavfsiz harakatlanishini ta’minlash maqsadida temir panjara o‘rnatildi.

🗂 O‘rganish davomida fuqarolarga amaldagi qonunchilik talablari ham tushuntirildi. Xususan, O‘zbekiston Respublikasi Vazirlar Mahkamasining 2021-yil 15-oktabrdagi 646-son qarori bilan tasdiqlangan "Ko‘p kvartirali uylarni boshqarish faoliyatini amalga oshirish qoidalari"ga muvofiq, ko‘p kvartirali uyga tutash hududlarda piyodalar, nogironligi bo‘lgan shaxslar hamda transport vositalarining, ayniqsa tez tibbiy yordam, yong‘in-qutqaruv va boshqa maxsus xizmat avtomobillarining erkin harakatlanishiga to‘sqinlik qiluvchi devorlar, panjaralar, shlagbaumlar va boshqa sun’iy to‘siqlarni o‘rnatishga yo‘l qo‘yilmasligi alohida ta’kidlandi.

✅ Deputat tomonidan amalga oshirilgan ushbu amaliy ishlar natijasida fuqarolarning erkin harakatlanishi uchun qulay sharoit yaratildi, yo‘l harakati xavfsizligi yaxshilandi hamda kelgusida favqulodda xizmatlarning hududga to‘siqsiz kirib borishi uchun zarur sharoit ta’minlandi.

🗣 Deputat Galina Gennadyevna bundan buyon ham fuqarolar murojaatlari deputatlik nazoratida bo‘lishi, mahallalarda aholini qiynayotgan muammolarni mutasaddi tashkilotlar bilan hamkorlikda bosqichma-bosqich bartaraf etish ishlari davom ettirilishini ta’kidladi.