YOSHLIK MAHALLASIDA BEPUL TIBBIY KO‘RIK TASHKIL ETILDI

Inson qadrini ulug‘lash, aholi salomatligini muhofaza qilish va tibbiy xizmatlardan foydalanish imkoniyatlarini kengaytirish borasida amalga oshirilayotgan ishlar doirasida xalq deputatlari Navoiy shahar Kengashi raisi Bazarov Baxtiyor Yaxshilikovich hamda O‘zbekiston Xalq demokratik partiyasi raisi Jo‘rabek Hamroyev hamkorligida Navoiy shahridagi Yoshlik mahallasi aholisi uchun bepul tibbiy ko‘rik tashkil etildi.

Mazkur xayrli tadbirdan ko‘zlangan asosiy maqsad aholi o‘rtasida sog‘lom turmush tarzini targ‘ib qilish, fuqarolarning salomatlik holatini muntazam nazorat qilish hamda kasalliklarning oldini olishdan iborat bo‘ldi. Tibbiy ko‘rik jarayonida malakali shifokorlar tomonidan fuqarolarga birlamchi tibbiy tekshiruvlar o‘tkazilib, zarur tavsiya va maslahatlar berildi.

Ayniqsa, keksa avlod vakillari hamda ehtiyojmand oilalar uchun tashkil etilgan mazkur tibbiy aksiya aholi tomonidan mamnuniyat bilan kutib olindi. Tadbir davomida qon bosimi, qand miqdori, yurak-qon tomir kasalliklari hamda umumiy salomatlik holati bo‘yicha tekshiruvlar amalga oshirildi.

Tadbir ishtirokchilari aholi salomatligiga qaratilayotgan bunday e’tibor va g‘amxo‘rlik uchun tashkilotchilarga minnatdorlik bildirib, bu kabi xayrli ishlar jamiyatda inson qadrini ulug‘lash va aholi farovonligini ta’minlashda muhim ahamiyat kasb etishini ta’kidladilar.

Kelgusida ham aholi salomatligini mustahkamlashga qaratilgan bu kabi ijtimoiy tadbirlarni muntazam tashkil etish rejalashtirilgan.