2026- jıl 12-mart kuni Xalıq deputatları Nókis rayonlıq
Keńesi deputatı, Korrupciyaǵa qarsı gúresiw hám qáwipsizlikti támiyinlew
boyınsha turaqlı komissiya baslıǵı Maxset Begdullaev Nókis rayonı oraylıq kóp
tarmaqlı poliklinikasında bolıp, medicina xızmetkerleri menen korrupciyaǵa
qarsı gúresiw máseleleri boyınsha ushırasıw ótkerdi. 

Deputat óz sózinde korrupciya tek ǵana ekonomikaǵa emes,
bálki sociallıq tarawǵa, sonıń ishinde xalıqtıń densawlıǵın saqlaw tarawına da
úlken zıyan jetkeretuǵının atap ótti. Poliklinikada ornatılǵan «Korrupciyaǵa
STOP» bannerleri hám monitorlardaǵı maǵlıwmatlar xızmetkerlerdiń de, emleniwge
kelgen puqaralardıń da qıraǵılıǵın arttırıwǵa xızmet etpekte. 

Ushırasıw sońında medicina xızmetkerleri ózlerin qızıqtırǵan
sorawlarǵa juwap aldı hám aldaǵı waqıtta bul baǵdardaǵı jumıslar turaqlı dawam
etetuǵını aytıldı.