📌 “Oqtepa” mahallasida saylovchilar bilan ochiq muloqot o‘tkazildi

Xalq deputatlari Sherobod tumani Kengashi raisi O. Tursunov hamda 22-Bo‘ston saylov okrugidan saylangan deputat A. To‘xtashov ishtirokida “Oqtepa” mahalla fuqarolar yig‘inida yashovchi saylovchilar bilan ochiq uchrashuv tashkil etildi.

Uchrashuv davomida fuqarolarga mamlakatimizda amalga oshirilayotgan keng ko‘lamli islohotlar, aholi farovonligini oshirish, hududlarni ijtimoiy-iqtisodiy rivojlantirish hamda qabul qilinayotgan farmon va qarorlarning joylarda ijrosini ta’minlash borasida olib borilayotgan ishlar haqida batafsil ma’lumotlar berildi.

Shuningdek, uchrashuv jarayonida saylovchilarning murojaatlari va takliflari tinglanib, ularni qiziqtirayotgan masalalar yuzasidan tegishli tushuntirishlar berildi. Ayrim murojaatlar joyida hal etish choralarini ko‘rish uchun mas’ul tashkilotlarga yo‘naltirildi.

Tadbir yakunida fuqarolarga huquqiy maslahatlar berilib, aholi bilan bunday ochiq muloqotlar kelgusida ham muntazam davom ettirilishi ta’kidlandi.

📎 Eslatib o‘tamiz, bunday uchrashuvlar hududdagi muammolarni bevosita joyida o‘rganish, aholi bilan muloqotni mustahkamlash hamda fuqarolarning taklif va tashabbuslarini qo‘llab-quvvatlashda muhim ahamiyat kasb etadi.