Oʻzbekiston Respublikasi Prezidentining  2024-yil 20-dekabrdagi  “Hududlarda yuqori iqtisodiy o‘sish va aholi bandligini ta’minlashning yangi tizimini yo‘lga qo‘yish hamda bu borada mahalliy hokimliklarning roli va mas’uliyatini oshirish chora-tadbirlari to‘g‘risida”gi PF-223-sonli Farmoni — ijrosini ta’minlash maqsadida Marg‘ilon shahrida qator loyihalar amalga oshirilmoqda.

Xususan, Xalq deputatlari Marg‘ilon shahar Kengashining 2025-yil 11-martdagi qaroriga muvofiq shahar markazini aholi yashashi va dam olishi uchun qulay hududga aylantirish, urbanizatsiya jarayonlarini jadallashtirish hamda yangi ish o‘rinlari yaratish ko‘zda tutilgan.

Loyihaga ko‘ra, shahar markazidagi Mustaqillik va B. Marg‘iloniy ko‘chalari kesishmasida joylashgan mavjud yer osti piyodalar o‘tish yo‘lini rekonstruksiya qilish orqali 40 ta yangi savdo va xizmat ko‘rsatish ob’yektlarini tashkil etish rejalashtirilgan. Mazkur maqsadlar uchun 5,5 mlrd so‘m mablag‘ ajratilgan bo‘lib, qurilish ishlarini o‘z vaqtida, sifatli va tizimli amalga oshirish yuzasidan deputatlik nazorati o‘rnatilishi belgilangan.

Xususan bugun viloyat Kengashi deputati Sh.Karimov va Margʻilon shahar Kengashi raisi O.Axmatshayev tomonidan qurilish ishlari ko‘zdan kechirilib, mas’ul tashkilotlar oldiga aniqlangan kamchiliklarni bartaraf etish, qurilish jarayonini belgilangan loyiha-smeta hujjatlariga muvofiq va sifatli tashkil etish bo‘yicha aniq vazifalar qo‘yildi.

Ta’kidlanganidek, mazkur loyiha nafaqat shahar infratuzilmasini yaxshilash, balki yangi ish o‘rinlarini yaratish va tadbirkorlikni rivojlantirishga xizmat qilishi lozim. Shu bois deputatlik nazorati doimiy asosda davom ettiriladi