Kengash faoliyati 

                                                                                                                                                                                                                             Xalq deputatlari Uzun tumani Kengashi deputatlari hamda viloyat Kengashi deputatlari hamkorlikda Uzun tuman tibbiyot birlashmasida xodimlar bilan davra suhbati o‘tkazdi. Uchrashuv davomida sog‘liqni saqlash tizimidagi mavjud holat, aholiga ko‘rsatilayotgan tibbiy xizmatlar sifati hamda sohada uchrayotgan muammolar muhokama qilindi.

Deputatlar o‘z so‘zlarida tibbiyot xodimlarining fidokorona mehnatini e’tirof etib, ularning faoliyatini qo‘llab-quvvatlash, ish sharoitlarini yanada yaxshilash masalalari doimiy e’tiborda bo‘lishini ta’kidladi. Shuningdek, birlashma moddiy-texnik bazasini mustahkamlash, zamonaviy tibbiy uskunalar bilan ta’minlash hamda kadrlar malakasini oshirish bo‘yicha takliflar bildirildi.

Davra suhbati davomida shifokor va hamshiralar o‘zlarini qiziqtirgan savollar, taklif va muammolarini ochiq bayon qildilar. Xususan, ayrim bo‘limlarda kadrlar yetishmovchiligi, dori-darmon ta’minoti va ish yuklamasi masalalari ko‘tarildi.

Yakunda deputatlar barcha taklif va murojaatlar o‘rganilib, tegishli tashkilotlar bilan hamkorlikda amaliy choralar ko‘rilishini ma’lum qildi. Uchrashuv ochiq va konstruktiv ruhda o‘tdi.