Xalq deputatlari Marg‘ilon shahar Kengashi deputatlari tomonidan Qirguli va Zuhro mahallalarida aholi murojaatlarini o‘rganish maqsadida uchrashuvlar tashkil etildi. O‘rganish jarayonida fuqarolar bilan bevosita muloqot qilinib, ularni qiynayotgan muammolar tinglandi.

Murojaatlarning aksariyat qismi bolalar nafaqasini tayinlash, hujjatlarni rasmiylashtirishdagi qiyinchiliklar hamda ijtimoiy yordam masalalari bilan bog‘liq bo‘ldi. Deputatlar tomonidan har bir murojaat alohida qayd etilib, ularni qonuniy tartibda hal etish yuzasidan tegishli tashkilotlarga yo‘naltirildi.

Shuningdek, uchrashuv davomida aholiga bolalar nafaqasi va ijtimoiy yordam turlarini olish tartibi, zarur hujjatlar hamda murojaat qilish mexanizmlari bo‘yicha tushuntirishlar berildi. Ayrim masalalar joyida hal etilib, nazorat talab etadigan murojaatlar deputatlar tomonidan nazoratga olindi.