Kambag‘allikni qisqartirish va aholi bandligini ta’minlash-mahalla darajasidagi mas’uliyat

Davlatimiz rahbari raisligida o‘tkazilgan videoselektor yig‘ilishi mamlakatimizda kambag‘allikni qisqartirish va aholi bandligini ta’minlash masalalarida yangi bosqichni belgiladi. 2025-yil yakunlariga ko‘ra 366 ming oila kambag‘allikdan chiqarilib, ishsizlik darajasi 4,8 foizga, kambag‘allik darajasi esa 5,8 foizga tushdi. Shu bilan birga, iqtisodiy o‘sish 7,7 foizga yetib, yalpi ichki mahsulot hajmi 147 milliard dollardan oshdi, eksport va xorijiy investitsiyalar hajmi sezilarli darajada ortdi. Bu amalga oshirilayotgan siyosatning real natijasi bo‘lib, davlat va xalq o‘rtasidagi ishonchni mustahkamlashga xizmat qiladi. 

Yig‘ilishda alohida urg‘u mahalla darajasidagi mas’uliyat va shaxsiy javobgarlikka qaratildi. Agar hududlarda ishsiz yoki kambag‘al oilalar saqlanib qolsa, demak, islohotlar o‘sha joyga yetib bormagan. Shu bois, “mahalla yettiligi” tizimi samaradorligini oshirish, hokimlar va mutasaddilarning shaxsiy javobgarligini kuchaytirish vazifasi belgilandi. Ayniqsa, “og‘ir” hududlarda kichik quyosh elektr stansiyalari qurish, tomorqa va ixtisoslashuvni rivojlantirish, oilaviy tadbirkorlikni imtiyozli kreditlar bilan qo‘llab-quvvatlash kabi tashabbuslar aholi daromadini oshirish va turmush sharoitini yaxshilashga xizmat qiladi. Shu bilan birga, har bir hududdagi
mahalla va oila real holati ro‘yxatga olinib, rejalashtirilayotgan loyihalar ana shu ma’lumotlarga tayangan holda amalga oshiriladi. 

Deputat sifatida biz belgilangan vazifalarning joylarda to‘liq va sifatli ijrosini nazorat qilish, ajratilayotgan mablag‘larning manzilli va samarali ishlatilishini ta’minlashni ustuvor vazifa deb bilamiz. Islohotlar markazida mahalla, mahalla markazida esa inson turibdi. Shu tamoyil bilan amalga oshirilayotgan ishlar nafaqat iqtisodiy o‘sishga, balki har bir oila hayot sifatini yaxshilashga xizmat qiladi. Biz barcha deputatlar aholining manfaatlarini himoya qilish va mahallalarda amaliy natijalarni ko‘rish ustidan doimiy parlament nazoratini olib boramiz.

Umuman olganda, belgilangan vazifalar ijtimoiy davlat tamoyillariga to‘la mos bo‘lib, “davlat-inson uchun” g‘oyasini mahallada
hayotga tatbiq etishga qaratilgan. Endi asosiy masala-qarorlar qog‘ozda qolib ketmasdan, har bir xonadon hayotida real natija berishiga erishishdir. Bu esa barchamizdan yuqori mas’uliyat va hamjihatlikni talab qiladi.

M.G'oibnazarov
Zomin tuman Kengashi deputati