Ózbekstan Respublikası Prezidenti Shavkat Mirziyoyevtiń Parlamentke hám Ózbekstan xalqına Múrájatında belgilengen wazıypalardı ámelge asırıwda Ózbekstan Liberal-demokratiyalıq partiyası tárepinen ushırasıw Bozataw rayonındaǵı Mektepke shekemgi hám mektep bilimlendiriw
bóliminde shólkemlestirildi. 

Ushırasıwda Ózbekstan máhálle belsendileri, jergilikli Keńes deputatları, partiya belsendileri qatnastı. 

Ilajda deputat Bekbosinova Gulshaxira Prezidentimizdiń Múrájatında sociallıq qorǵawdı kúsheytiw, kámbaǵallıqtı qısqartıw, xalıqtı dáramatlı etiw,
máhállelerdi rawajlandırıw hám jańa miynet bazarın qáliplestiriw sıyaqlı tiykarǵı baǵdarlar belgilep berilgenin hám bul wazıypalar Xalıq demokratiyalıq partiyasınıń baǵdarlamalıq maqsetleri hám sociallıq baǵdarlanǵan siyasiy poziciyası menen tıǵız baylanıslı ekenin aytıp ótti. Usı tiykarda partiyanıń tiykarǵı wazıypası Múrájatta belgilengen baǵdarlardı orınlarda durıs túsindiriw, xalıqqa jetkeriw hám olardı ámelge asırıw procesinde belsene qatnasıwdan ibarat ekeni bildirilip, partiyanıń deputatları arqalı jergilikli Keńeslerde anıq usınıslar kirgiziw jáne sociallıq áhmiyetke iye qararlar qabıl etiliwinde belsende bolıwǵa shaqırıldı. Ilajda qatnasıwshılar tárepinen bir qatar pikir-usınıslar alǵa qoyıldı. Ushırasıw juwmaǵında Prezident Múrájatında belgilengen wazıypalardı ámelge asırıwda máhállelerdiń hám partiyanıń belsene qatnasıwın támiyinlew, deputatlardıń jumısın jáne de nátiyjeli shólkemlestiriw, partiya máplerin isenimli qorǵawda belsendeligin arttırıw áhmiyetli ekenligi atap ótildi.