Xalq deputatlari Urganch shahar Kengashidagi O‘zbekiston Ekologik partiyasi deputatlik guruhi rahbari N.Masharipova va deputatlik guruhi a'zosi N.Sharipovalarning tashabbuslari bilan Urganch shahar hududida “O‘zbekiston-2030” strategiyasi doirasida “kichik yashil bog‘lar” va “mahalliy yashil bog‘lar”ni barpo etish hamda yashil maydonlar ulushini oshirish bo‘yicha amalga oshirilayotgan ishlar to‘g‘risida mutasaddi tashkilotlar axborotlari tinglandi. 

Mazkur vazifalar O‘zbekiston Respublikasi Prezidenti tomonidan 2023-yil 11-sentabrda qabul qilingan PF 158-son Farmonda tasdiqlangan “O‘zbekiston-2030” strategiyasining ekologik ahvolni yaxshilash, inson hayotiga ta’sir qiluvchi ekologik muammolarni bartaraf etishga qaratilgan ustuvor yo‘nalishlari bilan uyg‘un hisoblanadi. 

Urganch shahar qurilish va uy-joy kommunal xo‘jaligi bo‘limi tomonidan bildirildiki, PF-158-son Farmonda belgilangan vazifalar ijrosiga muvofiq, shahar hududida shaharning markazidan ochiladigan “Shovot” kanali bo‘ylab “kichik yashil bog‘lar”, mahallalarda esa “mahalliy yashil bog‘lar” barpo etilmoqda. Bularga turli mevali va manzarali ko‘chatlar ekilmoqda, mahallalarning qiyofasini yangilash va aholiga qulay dam olish maskanlari yaratish maqsadida bolalar maydonchalari, veloyo‘laklar va yashil o‘rindiqlar tashkil etilmoqda. Shuningdek, shahar bosh rejasi asosida bo‘sh hududlarda yashil maydonlar ulushini oshirish choralari, tasdiqlangan loyiha doirasida jamoat uchun ochiq yashil zonalar yaratish belgilangan.