Qishloq xo`jaligi xodimlari kuni munosabati bilan Yorqishloq qishlog`idan yetishib chiqqan taniqli fermer, Xalq deputatlari Andijon viloyati hamda Jalaquduq tumani Kengashi deputati, ko`p yillik samarali mehnati bilan el-yurt e`tiborini qozongan Qobiljon Qo`zievning volidasi
— Muborakxon ona xonadoniga yo`qlov tashrifi uyushtirildi. Mazkur tashrifda Jalaquduq tumani Kengashi raisi H. Latipov boshchiligida tuman Kengashi deputatlari A. Qurbonov va Sh. Xayitoxunovlar ishtirok etdilar. Yo`qlov chog`ida Muborakxon onaga samimiy ehtirom va e`zoz ko`rsatilib, bayram munosabati bilan iliq tabriklar va ezgu tilaklar bildirildi. Tashrif davomida mehnatsevar ona tomonidan farzand tarbiyasida berilgan ibratli hayot saboqlari, xususan, Qobiljon Qo`zievning qishloq xo`jaligi sohasida erishgan yutuqlari va jamoat ishlaridagi faoliyati zamirida oilaviy tarbiya va ona mehrining beqiyos o`rni alohida ta`kidlandi. Tuman Kengashi raisi H. Latipov qishloq xo`jaligi sohasida fidokorona mehnat qilayotgan fermerlar, ularning ota-onalari va ustozlariga hurmat va e`tibor davlat siyosati darajasida qo`llab-quvvatlanayotganini qayd etdi. Shuningdek, Muborakxon onaga mustahkam sog`lik, uzoq umr va oila a`zolari baxti tilab qoldi. 

Bunday yo`qlovlar xalqimizning qadimiy qadriyatlari — kattalarga hurmat, onaga ehtirom va mehnat ahliga e`zoz ko`rsatish kabi yuksak insoniy fazilatlarni yanada mustahkamlashga xizmat qiladi.