Ózbekstan Respublikası Oliy Majlisi Nızamshılıq palatası deputatı, "Adolat" social-demokratiyalıq partiyası frakciyası aǵzası Nodira Rashidova partiya Qaraqalpaqstan Respublikalıq Keńesi wákilleri menen birgelikte Qaraózek rayonında bolıp, bir qatar máseleler boyınsha ushırasıwlar ótkerdi hám úyreniwler alıp bardı. Dáslep deputat rayon hákimligi májilisler zalında xalıq deputatları rayonlıq Keńes deputatları, mákeme, jámiyetlik shólkem wákilleri, partiya aǵzaları menen korrupciyaǵa qarsı gúresiw hám aldın alıw boyınsha ushırasıw ótkerdi. Bunnan soń deputat N.Rashidova hám partiya wákilleri rayonlıq Keńes deputatları menen birgelikte Esim hám Berdaq máhálleleriniń juwapker wákilleri menen ushırasıp, aymaqlarda ámelge asırılıp atırǵan jumıslar jaqınnan úyrenildi. Úyreniwler dawamında máhálle jetiligi tárepinen xalıqtı jumıs penen bánt etiw, kámbaǵallıqtı qısqartıw hám sociallıq qorǵawǵa mútáj puqaralar menen islesiw hám "Kámbaǵallıqtan abadanlıqqa qaray" baǵdarlaması tiykarında alıp barılıp atırǵan jumıslar barısı boyınsha sáwbet alıp barıldı. Xalıqtı qıynap kiyatırǵan máselelerge sheshim tabıw hám olardı saplastırıw, múrájatlardı unamlı sheshiw baǵdarında pikir alısılıp, nızamshılıq tiykarları haqqında maǵlıwmat berdi. Sonday-aq, aymaqtaǵı sociallıq járdemge mútáj, kem támiyinlengen shańaraqlar jaǵdayları úyrenildi.Tómengi palata deputatı hám rayonlıq Keńes deputatları Esim mákan puqaralar jıyını aymaǵında ózin-ózi bánt etip, isbilermenlikti jolǵa qoyǵan isbilermenler menen ushırasıp, isbilermenlikke jańa qádem taslap atırǵan hám úy sharayatında ózin-ózi bánt etip, shańaraǵına dáramat kiritip atırǵan hayal-qızlardı qollap-quwatlaw maqsetinde bir qatar jeńillikler haqqında aytıp ótildi hám isbilermenlerdiń pikir-usınısları tıńlandı. Bunnan soń deputatlar hám partiya wákilleri Qaraózek rayonındaǵı 19-sanlı mektepke shekemgi bilimlendiriw mákemesinde bolıp, balalar ushın jaratılǵan imkaniyatlar hám sharayatlar menen tanıstı. Sonday-aq, 1-oktyabr-muǵallimler hám ustazlar kúni bayramı menen baqsha tárbiyashıların qutlıqladı. Shólkem tárbiyalanıwshıları tárepinen tayarlanǵan koncert baǵdarlaması tamashalanıp, deputatlar balalarǵa sawǵalar tapsırdı. Deputat hám partiya wákilleri rayon aymaǵındaǵı 33-sanlı mektepte bolıp, mektep oqıwshıları hám olardıń bilim alıwı ushın jaratılǵan imkaniyatlar, bilimlendiriw hám olardıń bos waqıtın nátiyjeli ótkeriw boyınsha alıp barılıp atırǵan jumıslar menen tanıstı. Mektep hákimshiligi tárepinen oqıtıwshılardıń iskerligi, sonday-aq, sabaq procesi menen tanıstırıldı. Mektep jámáátiniń deputatqa bildirgen múrájatı boyınsha oqıwshılar ushın suw tazalawshı úskenesin ornatıp berip búgingi kúnde mektep jámááti taza ishimlik suwınan paydalanıp kelmekte.