Yuksak natija e’tirofi — Quvada oltin va kumush medal sohiblari taqdirlandi  

Quva tumanida
2024–2025 o‘quv yilida umumiy o‘rta ta’lim maktablarini muvaffaqiyatli yakunlagan
3032 nafar o‘g‘il-qizdan 78 nafari oltin, 17 nafari esa kumush medal bilan maktabni
tamomladi. Bugun tuman hokimligida mazkur yoshlarning bilim va faoliyati munosib
rag‘batlantirildi — tantanali taqdirlash marosimi bo‘lib o‘tdi. 

Tadbirda Quva
tumani hokimi o‘rinbosari Ulug‘bek Solijonov, Xalq deputatlari tuman Kengashi kotibiyati
mudiri, tuman Kengashi deputati Rustamjon Nodirov, tuman Maktabgacha va maktab ta’limi
bo‘limi mudiri Dadajon Yunusov, maktab direktorlari, ustozlar, bitiruvchi yoshlar
hamda ularning ota-onalari ishtirok etdi. 

Tantanali marosimda
so‘zga chiqqanlar tomonidan yuksak medallar bilan ta’qdirlangan o‘quvchilarning
faoliyati, mehnatsevarligi va bilimga intilishi alohida ta’riflandi. Ta’lim tizimidagi
islohotlar, yaratilgan sharoitlar, pedagoglarning fidokorona mehnati samarasi o‘laroq
bugungi yutuqlarga erishilayotgani ta’kidlandi. 

Ushbu medallar
nafaqat yoshlarning o‘qishdagi muvaffaqiyatlarini, balki ularning faol hayotiy pozitsiyasini,
jamiyatdagi munosib o‘rnini e’tirof etishdir. Tadbir davomida bitiruvchilar va ularning
ota-onalari ham so‘zga chiqib, ko‘rsatilayotgan e’tibor va imkoniyatlar uchun minnatdorlik
izhor etishdi. 

Taqdirlash marosimi
yoshlar uchun ulkan rag‘bat, kelgusida ham ana shunday yuksak maqsadlar sari intilish
uchun kuch-g‘ayrat baxshida etishi bilan muhim ahamiyat kasb etdi.