O‘zbekiston Respublikasi davlat mustaqilligining 34 yillik bayramiga tayyorgarlik va uni o‘tkazish to‘g‘risidagi Yurtboshimizning qarorlariga
munosabat. 

Mustaqillik — bu har bir millat, har bir xalq uchun eng ulug‘ va bebaho ne’mat. Bugungi kunda Vatanimizda erishilayotgan barcha yutuq va islohotlarning zamirida — aynan shu tarixiy ne’mat, ya’ni mustaqillik tufayli paydo bo‘lgan imkoniyatlar mujassam. 

O‘zbekiston Respublikasi davlat mustaqilligining 34 yillik bayramiga tayyorgarlik ko‘rish va uni yuksak ruhda o‘tkazish to‘g‘risidagi qaror — davlatimizning taraqqiyot sari dadil qadam bosib borayotganini, xalq va davlat birligida amalga oshirilayotgan islohotlarning yangi bosqichga o‘tayotganini namoyon etadi. 

Men, O‘zbekiston Xalq demokratik partiyasi a’zosi sifatida, ushbu qarorda xalqimiz farovonligi, jamiyatda ijtimoiy adolatni ta’minlash, turmush darajasini oshirish, kam ta’minlangan va ehtiyojmand qatlamlarni qo‘llab-quvvatlash kabi partiyamizning asosiy g‘oyalariga hamohang tamoyillarning mujassamlashganini alohida ta’kidlayman. 

Aholini ma’naviy-ma’rifiy jihatdan qo‘llab-quvvatlash, yoshlar ongida vatanparvarlik va faol fuqarolik pozitsiyasini mustahkamlashga qaratilgan bayram tadbirlari orqali xalqimizning istiqlol g‘oyalariga sadoqati yanada mustahkamlanadi. 

Shu munosabat bilan, qaror ijrosini ta’minlash yo‘lida Oqoltin tumanida ham ma’naviy-ma’rifiy, madaniy-maishiy tadbirlarni, jumladan, hududdagi maktablar, mahallalar, yoshlar markazlari ishtirokida o‘tkaziladigan bayram dasturlarini samarali tashkil etish — mening fuqaroviy va deputatlik burchim deb bilaman. 

Mustaqillik — bu erkin hayot, tinch osmon, ozod fikr va halol mehnat samarasidir. 

Unga munosib bo‘lish har birimizning burchimizdir! 

Xalq deputatlari Oqoltin tumani Kengashi deputati Iroda Quchqorova