Tinchlik, totuvlik va oila qadriyatlarini mustahkamlash maqsadida ajrim yoqasiga kelib qolgan oilalarni yarashtirishga bag‘ishlangan tadbir bo‘lib o‘tdi. Tadbirda tuman kengashi deputatlari, oila va xotin-qizlar bo‘limi hamda psixologlar ishtirok etishdi.

Uchrashuv davomida oilaviy ajrimlarning oldini olish, er-xotin o‘rtasidagi kelishmovchiliklarni bartaraf etish yo‘llari, farzandlar tarbiyasiga salbiy ta’sir ko‘rsatadigan omillar haqida keng qamrovli ma’ruzalar tinglandi. Shuningdek, ishtirokchilar tomonidan hayotiy misollar asosida samarali muloqotlar tashkil etildi.

Deputatlar oilaning jamiyatdagi o‘rni, barqaror oila muhitining ahamiyati haqida o‘z fikr-mulohazalarini bildirib, ajrim yoqasiga kelib qolgan oilalarni yarashtirish bo‘yicha amaliy takliflar berdilar.

Ushbu tadbir o‘z samarasini berib, bir nechta oilalar o‘zaro yarashish yo‘lini tanladi. Bu kabi uchrashuvlar kelgusida ham davom ettirilishi rejalashtirilgan.