Ayni damda O‘zbekiston Respublikasi Oliy Majlisi Senati tomonidan “Mahalla – islohotlar markazida: mahalliy vakillik organlari va “mahalla yettiligi”ning hamjihat faoliyati” mavzusida davra suhbati onlayn formatda o‘tkazilmoqda.

Mazkur tadbirda xalq deputatlari Sirdaryo viloyati, tuman va shahar Kengashlari kotibiyatlari mudirlari, doimiy komissiyalar raislari, shuningdek hududlarda “mahalla yettiligi” faoliyatiga daxldor davlat organlari va tashkilotlar vakillari ishtirok etmoqda.

Davra suhbati davomida mahallalarda amalga oshirilayotgan islohotlarning samaradorligini oshirish, aholi muammolarini manzilli hal etish, mahalliy Kengashlar hamda “mahalla yettiligi” o‘rtasidagi hamkorlikni yanada mustahkamlash, hududlarni kompleks rivojlantirish va aholi farovonligini ta’minlash masalalari muhokama qilinmoqda.

Shuningdek, mahalliy vakillik organlarining nazorat funksiyalarini kuchaytirish, mahallalarda aniqlanayotgan muammolarni o‘z vaqtida bartaraf etish, sektorlar, davlat organlari va jamoatchilik vakillari o‘rtasidagi o‘zaro hamkorlikni yangi bosqichga olib chiqish bo‘yicha fikr va takliflar almashilmoqda.

♻️ Tadbir yakunlari bo‘yicha mahallalarda islohotlarni samarali amalga oshirish, aholining muammolarini hal etish hamda “mahalla yettiligi” faoliyati natijadorligini oshirishga qaratilgan muhim tavsiyalar ishlab chiqilishi kutilmoqda.