Xalıq deputatları Bozataw rayonlıq Keńesiniń Jergilikli byudjet, isbilermenlikti rawajlandırıw hám ekonomikalıq reformalar máseleleri boyınsha turaqlı komissiyasınıń gezektegi májilisi ótkerildi.
Májiliste kún tártibine muwapıq Bozataw rayonı Abadanlastırıw basqarmasınıń oraylıq kósheler boyında jaylasqan isbilermenlik subektleri menen dúzilgen shártnamalar tiykarında qattı turmıslıq shıǵındılardı alıp shıǵıw hám aymaqlardı abadanlastırıw xızmetleri ushın tariflerdi tastıyıqlaw haqqındaǵı másele kórip shıǵıldı.
Másele boyınsha Bozataw rayon hákimniń qurılıs, tosıqlarsız ortalıq jaratıw, kommunikaciyalar, kommunallıq xojalıq, ekologiya hám kóklemzarlastırıw máseleleri boyınsha orınbasarı - Abadanlastırıw basqarması baslıǵı J.Xabibullaev tárepinen orınlanıp atırǵan jumıslar, xızmetlerdi shólkemlestiriw tártibi hám usınılıp atırǵan tariflerdiń ekonomikalıq tiykarları haqqında keńeytilgen maǵlıwmat berildi. Sonday-aq, oraylıq kósheler boyında jaylasqan isbilermenlik subektleri menen dúzilgen shártnamalar tiykarında qattı turmıslıq shıǵındılardı óz waqtında alıp shıǵıw, sanitariyalıq tazalıqtı támiyinlew hám abadanlastırıw jumıslarınıń sapasın arttırıw máselesine ayrıqsha itibar qaratıldı.
Komissiya aǵzaları másele boyınsha pikir alısıp, tariflerdi tastıyıqlawdıń maqsetke muwapıqlıǵın, xızmetlerdiń sapasın hám olardıń úzliksiz ámelge asırılıwın talladı. Bildirilgen usınıslar hám pikirler esapqa alınıp, másele boyınsha tiyisli juwmaq qabıl etildi hám onı Xalıq deputatları Bozataw rayonlıq Keńesiniń sessiyası kún tártibine kirgiziw usınıs etildi.