Xalq deputatlari shahar Kengashi deputatlari M.Ergashova hamda R.Jo‘rayevalar ishtirokida “Deputat va yoshlar” mavzusida uchrashuv tashkil etildi. Mazkur uchrashuvning
asosiy maqsadi yoshlar bilan ochiq muloqot o‘rnatish, ularning muammo va takliflarini tinglash hamda yoshlarning jamiyatdagi faolligini yanada oshirishdan iborat bo‘ldi.
Uchrashuv davomida deputatlar yoshlar bilan samimiy suhbat qurib, bugungi kunda mamlakatimizda yoshlarga yaratilayotgan keng imkoniyatlar, ularning bilim olishi, kasb-hunar egallashi va tadbirkorlik faoliyatini boshlashi uchun yaratilgan sharoitlar haqida batafsil to‘xtalib o‘tdilar.
Shuningdek, yoshlarni vatanparvarlik ruhida tarbiyalash, ularning tashabbuslarini qo‘llab-quvvatlash hamda ijtimoiy hayotdagi faolligini kuchaytirish masalalari ham muhokama qilindi.
Muloqot jarayonida yoshlar o‘zlarini qiziqtirgan savollar bilan deputatlarga murojaat qildilar. Jumladan, bandlik, ta’lim, sport va madaniyat sohalarini rivojlantirish, shuningdek yoshlar uchun yaratilayotgan imkoniyatlardan samarali foydalanish yuzasidan o‘z fikr va takliflarini bildirdilar.
Deputatlar esa ko‘tarilgan masalalar yuzasidan tegishli tushuntirishlar berib, yoshlarning tashabbus va g‘oyalarini qo‘llab-quvvatlashga tayyor ekanliklarini ta’kidladilar.
Uchrashuv yakunida yoshlar tomonidan bildirilgan taklif va muammolarni o‘rganish hamda ularning ijobiy yechim topishi yuzasidan amaliy choralar ko‘rilishi qayd etildi. Bunday uchrashuvlar yoshlar va deputatlar o‘rtasidagi hamkorlikni yanada mustahkamlash, yoshlarning jamiyat hayotidagi faolligini oshirishda muhim ahamiyat kasb etishi ta’kidlandi.