Qaraqalpaq qobızı jáhán názerinde

Jańa reformalar turmısımızdıń barlıq baǵdarların qamtıp alıp, jańalanıwlar xalqımızdıń búgingi kúnnen razılıǵına sebep bolmaqta. Ásirese, xalqımızdıń milliy mádeniyatı, ádebiyatımız jáhánge júz tutıp, milliy ózgesheligimiz benen dúnya jámiechiliginde maqtansa alamız.

Barlıq tarawlar qatarında xalqımızdıń bay mádeniyatı úlgisi bolǵan baqsıshılıq hám jırawshılıq kórkem ónerin bunnan bılay da rawajlandırıw, onıń milliy mádeniyatımız hám kórkem ónerdegi ornı menen áhmietin arttırıwǵa ayrıqsha itibar qaratılıp, bul baǵdarda keń kólemli jumıslar baslanǵan edi.

Usı jıldıń 8-13-dekabr kúnleri Hindstannıń Nyu-Deli qalasında YUNESKOnıń materiallıq emes mádeniy miyrastı qorǵaw Húkimetleraralıq komitetiniń gezektegi sessiyası bolıp ótip, onda mámleketimizden usınıs etilgen qobız soǵıw hám atqarıwshılıq kórkem ónerin materiallıq emes mádeniy miyras elementleriniń dizimine kirgiziw haqqındaǵı qararı bir awızdan qabıl etildi.

Qobız soǵıw hám atqarıw óneriniń xalıqaralıq YUNESKO dizimine kirgiziliwi onıń tariyxıy, ruwxıy hám mádeniy qádiriyat sıpatındaǵı ornın xalıqaralıq dárejede tán alınıwı bolıp esaplanadı.

Bul xosh xabar xalqımızdıń qanshadan-qansha arzıw-ármanın, mádeniy miyrasımızdıń pútkil dúnya júzine tanıla baslawı, mádeniyatımızdıń joqarı dárejede rawajlanıwınıń kórinisi. Ata-babalardan kiyatırǵan bul miyrastı keleshek jaslarımızǵa úyretiw, atqarıwshılardı qollap-quwatlaw, jaslar arasında keńnen úgit-násiyatlaw, qızıǵıwshılıǵın arttırıw, sabaqlıqlarımızda milliy saz ónerlerimiz haqqında tolıq maǵlıwmatqa ie bolıwın támiyinlew, orınlarda bolsa úgit-násiyat jumısların alıp barıw biziń baslı wazıypamız esaplanadı.

Amanbay REYMOV,

Xalıq deputatları Qaraózek rayonlıq Keńesi deputatı, ÓzXDP deputatlıq toparı aǵzası