Ózbekstan
Respublikası ǵárezsizliginiń 35 jıllıǵı múnásibeti menen Ǵárezsizlik jıllarında
elimizde barlıq tarawlar qatarında hayal-qızlardıń jámiyettegi ornın
arttırıw, olardıń huqıqları menen máplerin qorǵaw, bántligin támiyinlew hám
isbilermenlik jumısın qollap-quwatlawǵa ayrıqsha itibar qaratıldı.

Ásirese,
sońǵı jılları hayal-qızlardıń ekonomikalıq belsendiligin arttırıw, olarǵa óz
biznesin baslaw hám rawajlandırıw ushın finanslıq, huqıqıy hám ámeliy járdem
kórsetiw boyınsha keń kólemli mámleketlik baǵdarlamalar ámelge asırılmaqta.

Bul processlerdi Qanlıkól rayonı
mısalında da ayqın kóriw múmkin.

- Hayal-qızlar isbilermenligin rawajlandırıw baǵdarında ǵárezsizlik
jıllarında ózgerisler:

- Bárinen burın, hayal-qızlarǵa tek
ǵana sociallıq qorǵaw obekti sıpatında emes, al jámiyettiń belsendi hám intaker aǵzası,
isbilermen, jumıs beriwshi hám shańaraqtıń abadanlıǵın támiyinlewshi kúsh
sıpatında qaraw qáliplesti.

Hayal-qızlardıń isbilermenlik
baslamaların qollap-quwatlaw ushın jeńilletilgen kreditler, subsidiyalar,
grantlar, kásip-ónerge oqıtıw hám biznes kónlikpelerin qáliplestiriw sisteması
jolǵa qoyıldı.

Sonıń ishinde, "Hayal-qızlar
dápteri" arqalı sociallıq qorǵawǵa mútáj, jumıssız hám isbilermenlik etiw
tileginde bolǵan hayal-qızlardı anıqlaw, olardıń mashqalaların mánzilli sheshiw
ámeliyatı jolǵa qoyıldı.

"Hayal-qızlar dápteri"ne
kirgizilgen isbilermenlik etiw tilegindegi hayal-qızlarǵa óz biznesin baslawı
ushın zárúr ásbap-úskeneler satıp alıwǵa subsidiyalar ajıratılıwı da áhmietli
imkaniyatlardan biri bolıp esaplanadı.

- Qanlıkól rayonında da
hayal-qızlardıń isbilermenlikke qızıǵıwshılıǵı artıp barmaqta. Ásirese,
máhállelerde hayal-qızlardıń mashqalaların úyreniw, olardıń isbilermenlik etiw
tilegin anıqlaw hám bar imkaniyatlardan paydalanıwǵa járdemlesiwge ayrıqsha
itibar qaratılmaqta.

Rayonımızda hayal-qızlar
tárepinen tigiwshilik, xızmet kórsetiw, sawda, konditerlik, sharwashılıq,
qusshılıq, ónermenchilik hám basqa da baǵdarlarda óz biznesin jolǵa qoyıw
boyınsha baslamalar ámelge asırılmaqta.

Eń áhmiyetlisi, bul joybarlar arqalı tek ǵana bir hayal-qızdıń dáramatı
támiyinlenip qoymastan, al jańa jumıs orınları jaratılıp, basqa hayal-qızlardı
da miynetke tartıw imkaniyatı payda bolmaqta.

- Mámleket tárepinen búgingi kúnde jańa imkaniyatlar
jaratılmaqta

- Bul baǵdarda 2025-jılı
qabıl etilgen qararlar ayrıqsha áhmiyetke iye.

Atap aytqanda, 2025-jıl
7-marttaǵı Prezident qararı menen hayal-qızlar isbilermenligin qollap-quwatlaw
ushın qosımsha 200 million AQSh dolları muǵdarında qarjı qaratılatuǵını
belgilendi.

Sonday-aq, "HAMROH"
baǵdarlaması sheńberinde unamlı kredit tariyxına iye hayal-qızlarǵa 100 million sumǵa shekem girewsiz kredit ajıratıw,
isbilermenlik joybarların ámelge asırıwda kepillik mexanizmlerinen paydalanıw
imkaniyatları jaratıldı.

Bul imkaniyatlar Qanlıkól
rayonında da isbilermenlik penen shuǵıllanıw tileginde bolǵan hayal-qızlar
ushın áhmiyetli tayanısh bolıp xızmet etpekte.

Búgingi kúnde isbilermenlikti tek ǵana qarjı menen támiyinlewdiń ózi jeterli emes. Isbilermen hayal
biznes reje dúziw, finanslıq esap-sanaq etiw, ónimin bazarǵa alıp shıǵıw,
marketing hám zamanagóy texnologiyalardan paydalanıwdı da biliwi kerek.

Sol sebepli mámleketlik baǵdarlamalarda hayal-qızlardı kásip-óner hám
isbilermenlikke oqıtıwǵa úlken itibar berilmekte.

2025-jıl ushın mámleket kóleminde 250 mıń hayal-qızdı kásip-óner hám
isbilermenlikke oqıtıw, 2 million hayal-qızdıń bántligin támiyinlew maqsetleri
belgilengen.

Qanlıkól rayonında da bul baǵdarda hayal-qızlardıń qızıǵıwshılıǵı hám
qábiletinen kelip shıǵıp, olardı kásip-ónerge oqıtıw, isbilermenlikke baǵdarlaw
hám ózin-ózi bánt etiwine járdemlesiw jumısları alıp barılmaqta.

- Qanlıkól rayonı hayal-qızları ushın xalıqaralıq joybarlar sheńberinde
de jańa imkaniyatlar jaratılmaqta.

Sonıń ishinde, Qanlıkól rayonında awıllıq isbilermenlikti rawajlandırıw
joybarı sheńberinde sociallıq qorǵawǵa mútáj hám jumıssız hayal-qızlar ushın
isbilermenlik boyınsha oqıwlar shólkemlestiriliwi, olarǵa biznesti baslaw hám
rawajlandırıw ushın grant imkaniyatları beriliwi boyınsha jumıslar alıp
barılǵan.

Bunıń áhmiyeti sonda, hayal-qızlarǵa tayar járdem beriw menen birge,
olardıń óz potencialına súyenip dáramat dáregin jaratıwına sharayat
jaratılmaqta.

- Isbilermen hayal - bul tek ǵana ózin emes, al shańaraǵın da
ekonomikalıq jaqtan qollap-quwatlaytuǵın insan.

Bir hayal-qızdıń isbilermenlik jumısı arqalı jańa jumıs ornı jaratılıwı,
basqa hayal-qızlardıń da jumıs penen támiyinleniwi, shańaraq dáramatınıń
kóbeyiwi hám máhállede ekonomikalıq belsendiliktiń artıwına alıp keledi.

Usı mániste hayal-qızlar isbilermenligin qollap-quwatlaw - bul bir
waqıttıń ózinde shańaraqtı qollap-quwatlaw, máhálleniń ekonomikalıq potencialın
arttırıw hám jańa jumıs orınların jaratıw degeni.

- Búgin hayal-qızlar ushın imkaniyatlar oǵada keń. Eń áhmiyetlisi -
baslama, háreket hám anıq maqset.

Mámleket tárepinen kredit, subsidiya, grant, oqıw hám másláhát
kórinisinde zárúr imkaniyatlar jaratılmaqta. Endi bul imkaniyatlardan nátiyjeli
paydalanıp, jańa joybarlardı ámelge asırıw, jumıs orınların jaratıw hám
shańaraqtıń abadanlıǵına úles qosıw hár bir isbilermen hayaldıń tiykarǵı
maqseti bolıwı kerek.

Isenemen, Qanlıkól rayonında da keleshekte óz biznesin jolǵa qoyǵan,
jańa jumıs orınların jaratıp atırǵan, zamanagóy texnologiyalardan paydalanıp
atırǵan hám óz ónimlerin keń bazarlarǵa alıp shıǵıp atırǵan hayal-qızlardıń
qatarınıń jáne de keńeyiwi ǵárezsizligimizdiń 35 jıllıǵı aldında ámelge
asırılıp atırǵan reformalardıń jáne bir ámeliy nátiyjesi boladı.

Ǵárezsizlik - bul imkaniyat.

Imkaniyattan únemli paydalanıp atırǵan hayal-qızlar bolsa elimiz
rawajlanıwınıń áhmiyetli tayanıshı bolıp esaplanadı.

Eshbaeva Lazzet Jiyenbaevna –

Xalıq deputatları Qanlıkól rayonlıq Keńesi deputatı.