Xalıq deputatları Bozataw rayonlıq Keńesiniń 1-sanlı «Palwash ataw» saylaw okruginen deputat, rayonlıq Keńes sekretariatı baslıǵı A.Ibragimov rayonda ámelge asırılıp atırǵan qurılıs hám abadanlastırıw jumıslarınıń barısı menen tanıstı.
Úyreniw dawamında Ózbekstan Respublikası Prezidentiniń 2026-jıl 5-fevraldaǵı PQ–49-sanlı qararı hám Qaraqalpaqstan Respublikası Joqarǵı Keńesi Prezidiumınıń 2026-jıl 6-marttaǵı 617-sanlı qararı tiykarında iske asırılıp atırǵan Bozataw rayonın kompleksli rawajlandırıw baǵdarlaması sheńberindegi jumıslar keńnen kórip shıǵıldı.
Ásirese, 95V038 «Kazanketken awılı – Kókshiel elatı» avtomobil jolınıń 16,7 kilometrden 35 kilometrge shekemgi 18,3 kilometrlik bólegin kapital ońlaw hám túngi jaqtılandırıw shıraqların ornatıw jumıslarınıń baslanǵanı atap ótildi. Bul jumıslar xalıqtıń qatnawı ushın qolay jaǵday jaratıw, joldaǵı qáwipsizlikti kúsheytiw hám rayon infrastrukturasın jáne de rawajlandırıw maqsetinde ámelge asırılmaqta.
Úyreniw barısında deputat ámelge asırılıp atırǵan jumıslardıń sapası, qurılıs normalarına sáykesligi hám belgilengen múddetlerde orınlanıwı máselelerine ayırıqsha itibar qaratıp, tiyisli usınıs hám pikirlerin bildirdi.
Sonday-aq, bunday keń kólemli infrastrukturalıq joybarlardıń ámelge asırılıwı rayon xalqınıń turmıs sapasın jaqsılawǵa, qatnaw qolaylıǵın arttırıwǵa hám aymaqtıń social-ekonomikalıq rawajlanıwına úlken úles qosatını atap ótildi.
«Xalıqtıń razılıǵı – eń joqarı baha. Jolı abat eldiń turmısı da abad boladı. El mápin kózlep atqarılıp atırǵan bunday iygilikli jumıslarda miynet etip atırǵan barlıq qurıwshılarǵa hám qatnasıwshılarǵa sheksiz minnetdarshılıq bildiremiz», – dedi deputat.