Xalq deputatlari Uchquduq tuman Kengashi kotibiyati bosh mutaxassisi T.Xaydarov hamda O‘zbekiston “Adolat” SDP Uchquduq tuman Kengashi raisi hamkorligida tuman Axborot-kutubxona markazining faoliyati o‘rganildi.

O‘rganish davomida kutubxonaning kitob fondi, kitobxonlarga yaratilgan shart-sharoitlar, aholining kitob mutolaasiga bo‘lgan qiziqishi hamda markaz faoliyatining samaradorligi bilan bog‘liq masalalarga e’tibor qaratildi.

Ta’kidlanganidek, bugungi kunda tuman Axborot-kutubxona markazi fondida 15 mingdan ortiq adabiyotlar mavjud bo‘lib, ular kitobxonlarning bilim va dunyoqarashini kengaytirish, ma’naviy saviyasini yuksaltirish hamda mutolaa madaniyatini rivojlantirishga xizmat qilmoqda.

Shuningdek, kutubxonaning 7 500 nafardan ortiq a’zosi mavjud. Hafta davomida esa o‘rtacha 400 nafarga yaqin kitobxon markaz xizmatlaridan foydalanish uchun tashrif buyuradi. Bu esa aholining kitobga bo‘lgan qiziqishi va kutubxonaning ma’naviy-ma’rifiy hayotdagi o‘rni muhim ekanligini ko‘rsatadi.

Kitob — tafakkur manbai, kutubxona esa bilim va ma’rifat maskanidir. Shu bois, aholining, ayniqsa, yoshlarning kitobxonlikka bo‘lgan qiziqishini yanada oshirish, kutubxona xizmatlari sifatini yaxshilash hamda kitob mutolaasini keng targ‘ib etish muhim ahamiyat kasb etadi.

O‘rganish davomida kutubxona faoliyatini yanada takomillashtirish, mavjud imkoniyatlardan samarali foydalanish va kitobxonlarga qulay shart-sharoitlar yaratish masalalariga alohida e’tibor qaratildi.