Жойларда турли соҳаларда самарали меҳнат қилаётган, фаолияти давомида юксак чўққиларни забт этган, ҳаётда ўз ўринини топган инсонларнинг ёшлар билан учрашувлари ташкил этиб келинмоқда.  

Мақсад келажак ворисларида соғлом тафаккурни шакллантириш, уларни касб-ҳунарга йўналтириш, ўз устида ишлаши учун кучли мотивация беришга қаратилган.

Қоровулбозор туманидаги 18-сон мусиқа ва санъат мактабида ташкил этилган навбатдаги ана шундай учрашувда ёшлар “Азия фруитс гарден”, “Қоровулбозор агро парранда”, “Сифатли жўжа”, “Қоровулбозор Нуробод”, “Сифатли сут маҳсулотлари” ва кўплаб бошқа корхоналар таъсисчиси, Халқ депутатлари вилоят Кенгаши депутати Фаррух Бекмирзаев билан мулоқот қилди.  

Учрашувда туман ҳокимининг биринчи ўринбосари Давлат Джумаев иштирок этиб, тадбиркорнинг фаолияти хусусида маълумот берди.

Мотивацияга бой бўлган учрашувда тадбиркор муваффақиятга эришиш сирлари, ўзининг ҳаёт йўлида эришган натижалари ҳамда унгача бўлган баъзи қийинчиликлар ҳақида сўзлаб берди. 

Бугунги кунда Фаррух Бермирзаев таъсисчилигидаги корхоналарда 600 дан ортиқ ишчилар меҳнат қилмоқда. Уларнинг аксариятини ёшлар ташкил этади. 

Ташаббускор тадбиркор маҳсулот ишлаб чиқариш билан биргаликда, чет давлатларга экспорт ҳам қилмоқда. Хусусан, Хитой давлатига қуритилган меваларнинг экспортини самарали йўлга қўйган. 

Учрашув давомида тадбиркор ёшларни қизиқтирган барча саволларига жавоб қайтарди, уларни олға интилишга чорлади.