Qonunga muvofiq, Oʻzbekiston Respublikasining harbiy xizmatga yaroqli erkak fuqarolari belgilangan yoshda muddatli harbiy xizmatga yoki safarbarlik chaqiruvi rezervidagi xizmatga jalb etiladi. Shuningdek, fuqarolar kontrakt asosida harbiy xizmatni ixtiyoriy ravishda tanlash huquqiga ham ega.

💬Qonunda harbiy xizmatning asosiy turlari – muddatli harbiy xizmat, safarbarlik chaqiruvi rezervidagi xizmat, kontrakt boʻyicha harbiy xizmat hamda rezervchilar xizmati aniq belgilangan. Harbiy xizmatga birinchi marta kirayotgan fuqarolar Davlat bayrogʻi oldida Vatanga qasamyod qabul qiladilar.

💬Mazkur hujjatda fuqarolarni harbiy xizmatga tayyorlash, chaqiruv tartibi, tibbiy koʻrikdan oʻtkazish, xizmatni kechiktirish yoki undan ozod etish asoslari, harbiy xizmatni oʻtash va undan boʻshatish tartiblari batafsil tartibga solingan. Shu bilan birga, harbiy xizmatni oʻtayotgan fuqarolarning huquqlari, ijtimoiy kafolatlari hamda mehnat faoliyati bilan bogʻliq imtiyozlari ham qonun bilan himoya qilinadi.

💬Qonunning asosiy maqsadi – Vatan himoyasini taʼminlash, fuqarolarda yuksak vatanparvarlik tuygʻusini shakllantirish, Qurolli Kuchlarning jangovar salohiyatini mustahkamlash hamda mamlakatning xavfsizligi va hududiy yaxlitligini ishonchli himoya qilishdan iborat.

🫥Mazkur qonun har bir fuqaroning Vatan oldidagi burchi va masʼuliyatini belgilovchi muhim huquqiy hujjat bo‘lib, yurt tinchligi, xavfsizligi va mudofaa salohiyatini mustahkamlashda alohida ahamiyat kasb etadi.