O‘zbekiston Respublikasida korrupsiyaning oldini olish, davlat organlari va tashkilotlari faoliyatida ochiqlik hamda shaffoflikni ta’minlash, xodimlarning xizmat vazifalarini halol va xolis bajarishini mustahkamlash borasida qator muhim huquqiy hujjatlar qabul qilinmoqda.

Shu munosabat bilan, Xalq deputatlari Uchquduq tuman Kengashi kotibiyati bosh mutaxassisi M.Muhammadiyev tomonidan O‘zbekiston Respublikasining 2024-yil 5-iyundagi O‘RQ–931-son “Manfaatlar to‘qnashuvi to‘g‘risida”gi Qonuni ijrosi yuzasidan Uchquduq tuman yo‘llaridan foydalanish davlat muassasasida o‘rganish ishlari olib borildi.

O‘rganish davomida mazkur qonun talablarining amaliyotga joriy etilishi, manfaatlar to‘qnashuvining oldini olish bo‘yicha belgilangan vazifalar ijrosi, xodimlarning mazkur yo‘nalishdagi huquqiy bilim va ko‘nikmalari, shuningdek, ichki tartib-taomillarga rioya etish holatlari ko‘rib chiqildi.

Bunda davlat muassasasida manfaatlar to‘qnashuviga yo‘l qo‘ymaslik, xizmat faoliyatida shaxsiy manfaatlarning ustuvor bo‘lishining oldini olish, xodimlarning mas’uliyatini oshirish hamda qonun talablariga qat’iy rioya etish masalalariga alohida e’tibor qaratildi.

O‘rganish yakunlari bo‘yicha aniqlangan holatlar yuzasidan mas’ullarga tegishli tavsiya va tushuntirishlar berildi. Kelgusida ushbu yo‘nalishdagi ishlarni yanada takomillashtirish, qonun talablarini amaliyotga samarali tatbiq etish bo‘yicha tegishli chora-tadbirlarni amalga oshirish belgilandi.