34-СОНЛИ МАКТАБГАЧА ТАЪЛИМ ТАШКИЛОТИ ФАОЛИЯТИ ЎРГАНИЛДИ
Халқ депутатлари Янгиқўрғон тумани Кенгаши котибияти мудири Эргашева Мунисхон Рустамбековна ҳамда туман Кенгаши депутати Аралов Латифжон Маҳмудович томонидан сайлов округида жойлашган 34-сонли давлат мактабгача таълим ташкилотида ўрганиш ишлари олиб борилди.
Ўрганиш давомида муассасада тарбияланувчилар учун яратилган шарт-шароитлар, гуруҳ хоналарининг ҳолати, санитария-гигиена талабларига риоя этилиши, ошхона ва озиқ-овқат омбори фаолиятига алоҳида эътибор қаратилди.
Хусусан, озиқ-овқат маҳсулотларини қабул қилиш, сақлаш ва таом тайёрлаш жараёнлари, маҳсулотларнинг яроқлилик муддати, уларни белгиланган ҳароратда сақлаш ҳолати ҳамда кунлик таомнома асосида овқатланишни ташкил этиш масалалари кўздан кечирилди.
Шунингдек, ошхона жиҳозларининг созлиги, идиш-товоқларнинг тозалиги, ходимларнинг санитария қоидаларига риоя этиши, ичимлик суви таъминоти ва тайёр таомларни тарбияланувчиларга сифатли етказиб бериш ҳолати ўрганилди.
Ўрганиш жараёнида муассаса раҳбарияти ва масъул ходимлар билан мулоқот ўтказилиб, тарбияланувчиларнинг соғлом ва хавфсиз овқатланишини таъминлаш, озиқ-овқат маҳсулотларини белгиланган талаблар асосида сақлаш ҳамда санитария-гигиена қоидаларига қатъий амал қилиш юзасидан зарур тавсиялар берилди.
Бу каби ўрганишлар мактабгача таълим ташкилотларида болалар учун муносиб, хавфсиз ва соғлом муҳит яратиш, таълим-тарбия ҳамда овқатланиш сифатини янада яхшилашга хизмат қилади.