Avvalo ta’kidlash o‘rinliki, har qanday tashkilot rahbari o‘z faoliyati borasida xalq vakillariga hisob berishga, so‘rovlariga javob yo‘llashga ham vijdon, ham qonun oldida majbur hisoblanadi.

Haqiqatan ham shundaymi? Bo‘lsa bo‘lar, bo‘lmasa g‘ovlab ketar qabilida ish tutib, deputat so‘rovlarini paysalga solayotgan rahbarlar haliyam bormi?
"Payariq hayoti" gazetasi muhbirining mazkur savollarga tuman Kengashi deputati Jasur Shamsiev shunday javob berdi.

- Deputat so‘rovini mensimaslik – qonunni mensimaslik bilan barobar,-deydi J. Shamsiev.- Har qanday so‘rovga mas’ul tashkilot rahbari 10 kun ichida javob berishi shart. Deputatlik so‘rovi shunchaki so‘rov emas. Chunki u xalq nomidan yuboriladi va xalqqa o‘z vaqtida javobini yetkazish kerak. 2023 yil davomida 37 ta deputatlik so‘rovlarini yubordim. So‘rovlarga befarqlik bilan yondoshgan tashkilot rahbarlari ham yo‘q emas. 28 ta deputatlik so‘rovimiz ijobiy hal etildi. 8 tasiga esa huquqiy maslahat berildi. Umuman olganda, deputatlik so‘rovlarimizga javoblar olinayapti. Ilgarilari umuman vaziyat boshqacha bo‘lgan. Deputatlik so‘rovlari rahbarning stol tortmasida qolib ketgan. Na og‘zaki, na yozma javob bo‘lgan.

Hozirgi deputatlar oldingidek emas. Sessiyaga kirib faqat qo‘l ko‘tarib tasdiqlash emas, balki o‘z fikrlari bildirish bilan yondoshayaptilar. Kerak bo‘lsa, muammo bo‘yicha tortishayapti ham. Unday qilsa, bunday bo‘ladi, bunday qilsa, unday bo‘ladi deb. Masalan, hokim yoki prokuror, ichki ishlar boshliqlari hisobotlarida ilgarilari jimjitlik hukm surardi. Hozir deputatlarimiz dadil-dadil gapirib, rahbarlarimizga jo‘yali, kerakli savollar va takliflarni taqdim etayapti. Bu oshkoralik, ochiqlikdan darak deb o‘ylayman.

Ochig‘ini aytganda, deputatlarimiz ish faoliyatida jonlanish bor. Lekin xalqimiz deputatlarimizdan bundan ham zalvolliroq natijalarni ko‘tarishga umid bog‘lamoqdalar.

Xalq deputatlari Payariq tuman Kengashi deputati Jasur Shamsiev