Xalq deputatlari Qo‘qon shahar Kengashi Kotibiyati mudiri A.Nosirov hamda shahar Kengashi deputati I.Fayzullayev tomonidan 2-sonli texnikumda tahsil olayotgan yoshlar bilan uchrashuv o‘tkazildi.

Uchrashuvda texnikumning 100 nafardan ortiq o‘quvchi-yoshlari ishtirok etdi. Ochiq muloqot shaklida tashkil etilgan tadbir davomida yoshlarning ta’lim olishi, kelajakdagi kasbiy faoliyati va sog‘lom turmush tarzini shakllantirish bilan bog‘liq muhim masalalar yuzasidan fikr almashildi.

Suhbat davomida yoshlarni kasb-hunar egallashga, zamonaviy bilim va ko‘nikmalarni o‘zlashtirishga, bozor talablariga mos mutaxassis bo‘lib yetishishga intilishlari zarurligi haqida so‘z yuritildi. Muayyan kasbga ega bo‘lish yoshlarning kelajakda o‘z o‘rnini topishi, bandligini ta’minlashi va mustaqil hayotga tayyorlanishida muhim omil ekani ta’kidlandi.

Shuningdek, uchrashuvning muhim mavzularidan biri giyohvandlikning oldini olish masalasi bo‘ldi. Yoshlar o‘rtasida giyohvandlik vositalarining salbiy oqibatlari, bunday illatning inson salomatligi, ta’limi, oilasi va kelajagiga yetkazishi mumkin bo‘lgan zararli ta’siri haqida tushuntirishlar berildi.

Yoshlarning bo‘sh vaqtini mazmunli tashkil etish, sport va foydali mashg‘ulotlarga jalb qilish, ilm olish va kasbiy ko‘nikmalarni rivojlantirish orqali turli salbiy ta’sirlardan himoyalanish muhimligi qayd etildi.

Uchrashuv davomida yoshlar o‘zlarini qiziqtirgan masalalar yuzasidan fikr va takliflarini bildirib, o‘zaro ochiq muloqot olib borildi.

Xalq deputatlari Qo‘qon shahar Kengashi