Xalq deputatlari Boyovut tumani Kengashi deputati X.Jo‘raxolov Shirin mahallasida mahalla yettiligi hamda saylovchilar bilan uchrashuvi bo‘lib o‘tdi.

Uchrashuv avvalida deputat o‘ziga biriktirilgan “Odam savdosiga qarshi kurashish to‘g‘risida”gi O‘zbekiston Respublikasi Qonunining yangi tahriri, ya’ni 2020-yil 17-avgustda qabul qilingan O‘RQ-633-son Qonunning mazmun-mohiyati yuzasidan yig‘ilganlarga tushuntirish berdi.

Suhbat davomida odam savdosining oldini olish, ushbu turdagi jinoyatlardan fuqarolarni himoya qilish, jabrlanganlarga zarur yordam ko‘rsatish hamda odam savdosiga qarshi kurashishda davlat organlari va fuqarolik jamiyati institutlarining o‘zaro hamkorligi masalalariga alohida e’tibor qaratildi.

Shuningdek, fuqarolarga odam savdosi bilan bog‘liq turli xavf-xatarlarning oldini olish, shubhali holatlarga nisbatan befarq bo‘lmaslik va qonunchilikda belgilangan tartiblarga amal qilish yuzasidan tegishli tushuntirishlar berildi.

Uchrashuv davomida fuqarolar tomonidan hududdagi mavjud muammolar va takliflar yuzasidan bir qator masalalar ko‘tarildi.

Xususan, Shirin mahallasining “Zamona” ko‘chasiga tungi yoritish chiroqlarini o‘rnatish, shuningdek, “Yangiasr” ko‘chasida joylashgan ko‘p qavatli uylarning kanalizatsiya tizimini ta’mirlash zarurligi bildirildi.

Bildirilgan taklif va murojaatlar deputat tomonidan nazoratga olinib, mazkur masalalar yuzasidan tegishli mutasaddi tashkilotlar bilan hamkorlikda o‘rganish ishlari olib borilishi ta’kidlandi.

O‘rganish yakunlariga ko‘ra, aniqlangan holatlar asosida tegishli chora-tadbirlar belgilanishi hamda amalga oshirilgan ishlar yuzasidan fuqarolarga belgilangan tartibda ma’lumot berilishi bildirildi.