Húrmetli Prezidentimiz baslamaları: Qaraqalpaqstan Respublikası rawajlanıwınıń jańa basqıshı

Ózbekstan Respublikası Prezidenti Sh.M.Mirziyoyev tárepinen Qaraqalpaqstan Respublikası ushın arnawlı qabıl etilgen párman hám qararlarınıń áhmiyeti

Tań sáhárde Ámiwdárya boylarında quyash bas kótergende, sahra ústinde taralǵan nur – Qaraqalpaq úlkesiniń búgingi kórinisin jáne de ayqın kórsetedi. Keshe ǵana samaldan kóterilgen qum izleriniń ornın búgin jańalanıw izleri baspaqta. Bir waqıtları Araldıń sheginiwi menen awır jaǵdaydaǵı táǵdiyr búgin ózgerislerge, tikleniwge hám isenimge qaray júz burmaqta. Bul mákán kóp sınaqlardı basınan keshirdi, biraq sınbadı — sabır etti, kútti hám búgin ózgerislerdi qarsı alıp atır. 

Qaraqalpaqstan Respublikası búgin ápiwayı aymaq emes — bul mákan búgin insan qádirin ulıǵlaw ideyası turmısqa tereń sińip baratırǵan múqaddes úlke bolıp tabıladı. Bul jerde hár bir jańa mektep, hár bir zamanagóy emlewxana, hár bir jumıs ornı artında bir ullı maqset sáwlelengen : insannıń múnásip turmıs keshiriwi. 

Mámleketimiz basshısı Shavkat Mirziyoyev aytıp ótkenindey, reformalardıń tiykarǵı mazmunı statistikalıq kórsetkishlerde emes, bálkim adamlardıń turmıstan razı bolıp jasawında óz kórinisin tabadı. Qaraqalpaqstan Respublikasında ámelge asırılıp atırǵan keń kólemli ózgerisler tap usı haqıyqattı tastıyıqlamaqta. 

Ózbekstan Respublikası Prezidenti Shavkat Mirziyoyev tárepinen Qaraqalpaqstan Respublikası xalqın hár tárepleme qollap-quwatlaw, aymaqtı sociallıq-ekonomikalıq rawajlandırıw hám xalıqtıń múnásip turmıs dárejesin támiyinlewge qaratılǵan párman hám qararları sońǵı jıllarda jańa basqıshqa kóterildi. Bul hújjetler aymaqtıń ekonomikalıq potencialın bekkemlep ǵana qoymastan, bárinen burın insan qádirin uluǵlaw, adamlardıń táshwishlerin tıńlaw hám ámeliy sheshim tabıwǵa xizmet etip atır. 

Jurtbasshımız óz shıǵıp sóylewlerinde mudamı “Insan qádiri ushın” degen principti eń tiykarǵı maqset retinde belgilep keledi. Prezidentimizdiń : “Insan qádiri biz ushın eń ullı hám múqaddes kriterya bolıp tabıladı. Hár bir watanlasımızdıń turmıstan razı bolıp jasawı-barlıq reformalarımızdıń baslı maqseti”, degen sózleri búgingi mámleket siyasatınıń mazmun-mánisin tolıq ańlatadı. Ásirese, ekologiyalıq jáne sociallıq máseleler menen júzbe-júz kelgen Qaraqalpaqstan xalqı ushın bul itibar kútá úlken áhmiyetke iye bolmaqta. 

Qaraqalpaqstan Respublikası aymaǵında ámelge asırılıp atırǵan keń kólemli qurılıs jumısları, jańa islep shıǵarıw quwatlılıqlarınıń iske túsiriliwi, infrastrukturanıń jańalanıwı hám xalıq bántligin támiyinlewge qaratılǵan ilajlar prezident párman hám qararlarınıń ámeliy nátiyjesi. Ásirese, Aral boyı aymaǵın rawajlandırıw, ishimlik suwı támiynatın jaqsılaw, jol-transport sistemasın modernizaciyalaw, bilimlendiriw hám medicina mákemelerin jańalaw boyınsha is-háreketler aymaq xalqınıń turmıs sapasın sezilerli dárejede arttırıp atır.  

Mámleketimiz basshısı Qaraqalpaqstanǵa saparı dawamında ápiwayı puqaralar menen ashıq sáwbetlesip, olardıń mashqalaların tikkeley esitip, óz ornında sheshiw boyınsha tapsırmalar berdi. Bul bolsa “Xalıq mámleket mákemelerine emes, mámleket mákemeleri xalqımızǵa xizmet etiwi kerek” degen principtiń ámeliy kórinisi.
Prezidentimizdiń : “Hár bir basshı áwele xalıq dártin seziniwi, adamlarımızdıń awırın jeńil qılıw ushın shın kewilden xizmet etiwi shárt”, degen súreni Qaraqalpaqstanda is alıp barıp atırǵan barlıq basshı hám juwapkerler moynına úlken juwapkershilik júkleydi. 

Sonıń menen birge, aymaqta isbilermenlikti rawajlandırıw, jaslardı qollap-quwatlaw, hayal-qızlar bántligin támiyinlew, zamanagóy turaq-jaylar qurıw, sociallıq qorǵawǵa mútáj qatlamlardı qollap-quwatlaw boyınsha qabıl etilgen qararları xalıq abadanlıǵın támiyinlewge qaratılǵan anıq hám mánzilli is-ilájlar bolıp xizmet etpekte. Prezidentimiz aytıp ótkeni sıyaqlı, “Jańa Ózbekstandı qurıwda hár bir aymaq, hár bir máhálle, hár bir shańaraq itibarımız orayında boladı”.
Bul sózler Qaraqalpaqstan mısalında óziniń jarqın tastıyıǵın tappaqta.  

Qaraqalpaqstan Respublikasında ekologiyalıq jaǵdaydı jaqsılaw, jasıl aymaqlardı keńeytiw, xalıq salamatlıǵın bekkemlew, zamanagóy emlewxanalar hám diagnostika orayların qurıw boyınsha ámelge asırılıp atırǵan jumıslar da insan qádirin ulıǵlaw siyasatınıń ajıralmas bólegi bolıp esaplanadı. Aral teńizi baxıtsızlıǵı aqıbetlerin jumsartıw, xalıq ushın múnásip jasaw sharayatların jaratıw mámleket siyasatınıń tiykarǵı baǵdarına aynalǵan.  

Jurtbasshımızdıń pármanları — bul tek ǵana ápiwayı hújjet emes, bálkim jerge sebilgen tuqım sıyaqlı. Hár bir tuqımnıń maqseti — adam kewilin jarıtıw, imkaniyatlardı jaratıw, nátiyjesi bolsa xalıq turmısında úmittiń, isenimniń hám abadanlıqtıń ayqın kórinisi menen sáwlelenedi.

Biz deputatlar ushın bolsa bul tuqımdı jerge sebiw, onı suwǵarıw hám miywege aylanıwına ámeliy úles qosıw — tekǵana wazıypa emes, bálkim maqtanısh. Hár bir qarar, hár bir ilajdı turmısta qollanıw arqalı, adamlardıń dártin tıńlaw, olardıń ómirin jeńillestiriw hám párawan keleshekke qaray jol ashıw biziń shın kewilden atqaratuǵın minnetimiz. Nátiyjede, Qaraqlpaqstan Respublikası xalqı ushın qabıl etilgen Prezidentimiz pármanları + anıq maqset + xalıq ómirindegi nátiyje = insan qádiri joqarı, úmiti jarıq, jámiyeti rawajlanǵan mákán. 

Xalıq deputatları Nókis qalalıq Keńesi deputatı

Aymuratov Aydarbek
Quwatbaevich