Быйыл Өзбекстанның БМШға ағзалығына 33 жыл толды. Соның менен бирге, шөлкемге тийкар салынғанына 80 жыл болды. Екинши жер жүзилик урыс апатшылықларынан кейин, инсаният бундай қырғынлар қайталанбаўы ушын БМШны дүзди ҳәм бүгинги күнде 193 мәмлекетти бирлестирген шөлкем глобаллық аўызбиршиликтиң символына айланған.

Соңғы жылларда Өзбекстан сыртқы сиясатының тийкарғы бағдарларынан бири – БМШ пенен бирге ислесиўди беккемлеў болды. Бул бирге ислесиў, әсиресе, турақлы раўажланыў тараўындағы миллий мақсетлерди әмелге асырыўда айрықша әҳмийетке ийе болмақта.

Президент Шавкат Мирзиёев БМШ Бас Ассамблеясының 80-сессиясындағы шығып сөйлеген сөзинде: “Дүньяда халықаралық институтлардың роли төменлемекте, келиспеўшиликлер ҳәм урыслар күшеймекте, социаллық теңсизлик артып бармақта. Биз демократиялық, ҳуқықый ҳәм дүньялық Жаңа Өзбекстанды қурыў сиясатын алып бармақтамыз. Жаңа Өзбекстан барлық мәмлекетлер менен ашықтан-ашық сөйлесиў ҳәм аўызбиршилик тәрепдары болып есапланады,” – деп атап өтти. Бул пикир мәмлекеттиң сыртқы сиясий позициясын айқын көрсетти.

Өзбекстан бүгин БМШтың ең белсенди ағзаларынан бирине айланған. Мәмлекет БМШтың 200 ден аслам жойбарында қатнаспақта.

2021-2023-жылларда Өзбекстан биринши мәрте БМШтың Инсан ҳуқықлары бойынша кеңесиниң ағзасы болды. Сондай-ақ, ЮНЕСКО, ЭКОСОС, ХМТ ҳәм басқа да абырайлы структураларға да мәмлекетимиз ағзалыққа сайланды.

Өзбекстанның басламалары халықаралық көлемде де жоқары баҳаланбақта. Республика басламасы менен БМШ Бас Ассамблеясы 13 әҳмийетли резолюцияны қабыл етти. Олардың арасында “Орайлық Азияда тынышлық ҳәм турақлылықты беккемлеў,” “Ағартыўшылық ҳәм диний кеңпейиллик,” “Аралбойы регионын экологиялық инновациялар зонасы деп жәриялаў” сыяқлы ҳүжжетлер айрықша әҳмийетке ийе. 

Мырзатаев Махмут Жиенбаевич

 "10-санлы Пахта пункт” сайлаў округинен

 Халық депутатлары Кегейли районлық

 Кеңеси депутаты