Ayni kunlarda Yangi O‘zbekistonni barpo etish yo‘lidagi ezgu intilish va sa’y-harakatlarimiz hal qiluvchi bosqichga ko‘tarilmoqda.Bu yo‘lda milliy o‘zligimiz va g‘ururimiz timsoli bo‘lgan ona tilimiz, hech shubhasiz, beqiyos kuch va ilhom manbai bo‘lib xizmat qilmoqda. Bu fikrlar O‘zbekiston Respublikasi Prezidentining o‘zbek tili bayrami munosabati bilan mamlakat xalqiga yo‘llagan tabrigidan olindi. 

Davlatimiz rahbarining 2019-yil 21-oktabrda qabul qilingan “O‘zbek tilining davlat tili sifatidagi ta’siri va mavqeini tubdan oshirish chora-tadbirlari to‘g‘risida” gi farmoniga asosan ushbu tarixiy sana bayram sifatida belgilandi. 

O‘zbek tili O‘zbekiston Respublikasi aholisining mutlaq ko‘pchiligini tashkil etuvchi o‘zbek xalqining ona tilidir. Bu ham O‘zbekiston birligi va yaxlitligi, jamiyat jipsligining muhim omilidir. 

Aytish joizki, bugungi kunda mamlakatimizda 150 ga yaqin milliy madaniy markazlar faoliyat ko‘rsatmoqda, ommaviy axborot vositalari o‘zbek tili bilan bir qatorda qoraqalpoq, rus, qozoq, qirg‘iz, tojik, turkman tillarida ham efirga uzatilmoqda, maktablarimizda o‘quv jarayoni 7 tilda olib borilayotgani jahonda o‘ziga xos tajribadir. Mamlakatimizda xorijiy tillarga ixtisoslashtirilgan va xorijiy tillarga kadrlar tayyorlaydigan ta’lim muassasalari soni ortib borayotgani ham bu boradagi muhim o‘zgarishlar samarasidir.