“MOTAMSARO ONA” HAYKALI POYIGA GULCHAMBARLAR QO‘YILDI

9 may - Xotira va qadrlash kuni munosabati bilan shahar hokimligi, harbiylar, davlat va jamoat tashkilotlari rahbarlari, mehnat faxriylari, yoshlar, keng jamoatchilik vakillari “Motamsaro ona” haykali poyiga gulchambarlar qo‘yib, o‘tganlar xotirasiga hurmat bajo keltirdilar. Zero, Motamsaro ona siymosida urushing barcha dardu tashvishlari, mudhish oqibatlari mujassam.

Xotira va Qadrlash kuni bizni ana shu hayotning qadriga yetishga, keksa avlod vakillarini qadrlashga, barcha birdek do‘st va hamkor bo‘lib yashashga daʼvat qiladi.

Shuni aytish joizki Xotira va Qadrlash kunini munosib nishonlashdan ko‘zlangan bosh maqsadimiz – Vatan himoyachilarini xotirlash, oramizdagi fidoyi insonlarning, tinchlikning qadriga yetish, tinch-osoyishta yashayotganimizning shukronasini qilishdan iborat.

Bu har qanday kishini maʼnan rag‘batlantiradi, uni yashashga, elu yurtga sadoqat va qatʼiyat bilan xizmat qilishga undaydi. Zero xotira hamisha muqaddas, qadr azizdir.