Zomin tumani Maktabgacha va maktab ta’limi bo‘limiga qarashli 34-umumiy o‘rta ta’lim maktabida muhim sanaga bag‘ishlangan tantanali tadbir bo‘lib o‘tdi — ta’lim maskani tashkil topganining 50 yillik yubileyi keng nishonlandi.

Mazkur maktab 1975-yilda tashkil etilgan bo‘lib, oradan o‘tgan yarim asr davomida yuzlab o‘quvchilarga bilim va tarbiya berib, jamiyatimizga yetuk mutaxassislar, olimlar, ustozlar va turli soha vakillarini yetkazib berdi. Maktab bugungi kunda ham o‘z faoliyatini zamon talablari asosida davom ettirib, zamonaviy o‘quvchilar avlodini kamolga yetkazmoqda.

Yubiley tadbirida maktab tarixiga oid esdaliklar, fotosuratlar va yutuqlar aks ettirilgan maxsus ko‘rgazma tashkil etildi. Shuningdek, maktabning faxriy ustozlari, nuroniylar, ilgari bu dargohda tahsil olgan bitiruvchilar, ota-onalar va keng jamoatchilik vakillari ishtirok etdi.

Tadbirda Xalq deputatlari tuman Kengashi deputati O‘zbekiston faxriylarining ijtimoiy faoliyatini qo‘llab-quvvatlash “Nuroniy” jamg‘armasi tuman bo‘limi raisi O‘rol Oqqulov so‘zga chiqib, maktab tarixiga nazar tashlab, bu maskan qanchadan-qancha izlanuvchan yoshlarga bilim va tarbiya bergani, bu yutuqlarda fidoyi ustozlarning o‘rni beqiyos ekanini ta’kidladi. U maktabda o‘tkazilgan yillarini iliq xotiralar bilan esladi.

Bayramona tadbir davomida o‘quvchilar tomonidan tayyorlangan badiiy chiqishlar, kuy-qo‘shiqlar, sahna ko‘rinishlari mehmonlarga yuqori kayfiyat ulashdi. Tadbir yakunida faxriy ustozlarga esdalik sovg‘alari topshirildi, bitiruvchilar o‘z ustozlariga chuqur minnatdorlik bildirishdi.

Bu kabi tadbirlar maktab tarixini e’zozlash, yosh avlodga namunaviy ustozlar va o‘z maktabi bilan faxrlanish tuyg‘usini singdirishda muhim ahamiyat kasb etadi.